Kultura

Sustrai-musikea eta gaur egungo proposamenak buztartuko dauz

Thu, 23 Jul 2026 12:20:54 +0000

Getxoko Nazinoarteko Folk Jaialdiaren 42. edizinoa irailaren 9tik 13ra bitartean egingo da. Aurten be sustrai-musikea eta gaur egungo proposamenak buztartuko dauz, eta hogei jardueratik gora eskainiko dauz Muxikebarrin, Areetako Geltokia plazan, plazako anfiteatroan eta Ereagako hondartzearen inguruan. Ordainpeko kontzertuetan Flook, Gwendal, Xabi Aburruzaga, Xabier Díaz eta Adufeiras de Salitre, Dulce Pontes eta Xalbador, Urepeleko Artzaina ikuskizuna izango dira protagonista. Azken horrek Xalbador bertsolariari omenaldia egingo deutso, musikea, literaturea eta bertsolaritzea buztartuz. Jaialdiaren antolatzaileek nabarmendu dabe folkaren sustraiak eta gaur egungo sorkuntza lotzea dala ekimenaren ezaugarri nagusietako bat. Doako egitarauak be leku garrantzitsua izango dau aurten. Areetako Geltokia plazatik igaroko dira, besteak beste, Malvariche, Klezmerama, Anna Ferrer, Elizabeth Davidson-Blythe eta Daniel Quayle, Kale Hizketak eta La Jose. Gainera, familientzako El país de los sonidos ikuskizuna eta Sonarium instalazino parte-hartzailea be izango dira. Jaialdiaren giroa Ereagako hondartzara be zabalduko da, Celtas Cortos eta ETS taldeen doako kontzertuekin. Horrez gain, Maltatik etorritako Marsa Scouts Pipe Band taldeak Getxoko eta Bilboko kaleak girotuko dauz bere kalejiragaz, jaialdiaren nazinoarteko eta parte-hartzaile izaerea indartuz.

Pantzartek hamar ikuskizun ekoitzi eta 500 emonaldi baino gehiago eskaini dauz

Wed, 22 Jul 2026 18:46:28 +0000

Bilboko Pantzart txotxongilo eta objektuen antzerki konpainiak nazinoarteko birea egingo dau datozen hileetan Kolorez Kolore lanagaz. Kamerunen eta Txinan egingo diran nazinoarteko jaialdietan parte hartuko dau, eta ikuskizuna aurkezteaz gain, tailerrak eta kultur trukea sustatzeko jarduereak be eskainiko dauz. Lehenengo geldialdia garagarrilaren amaieran egingo dau Kamerungo Marionnette en Marche Nazinoarteko Txotxongilo Jaialdian. Bertan, antzezlana eskaintzeaz gain, dramaturgia, eraikuntzea eta txotxongiloen manipulazinoari buruzko tailerrak emongo dauz, eta bertako artistekin sorkuntza eszeniko batean parte hartuko dau. Urriaren amaieran, barriz, Makaoko Macau Contemporary Puppet Festival jaialdian izango da. Kolorez Kolore Juan Kruz Igerabideren haur-poesian eta Kvιta Pacovská artista txekiarraren proposamen plastikoan oinarritutako objektuen antzezlana da. Poesia, musikea, txotxongiloak eta koloreak buztartzen dauz, eta hizkuntza artistiko guztiak maila berean jarten dauz proposamen eszenikoan. 2012an sortu zanetik, Pantzartek hamar ikuskizun ekoitzi eta 500 emonaldi baino gehiago eskaini dauz. Nazinoarteko bira honek konpainiaren lana beste herrialde batzuetara zabaltzeko eta txotxongiloen arteko kultur trukea indartzeko aukerea emongo deutso.

'Mendian gora' da, euskeraz grabadutako abesti bakarra

Mon, 20 Jul 2026 12:44:56 +0000

Jazz klasikoaren sustraiak eta soinu garaikideak buztartzen dauz Irati Bilbaoren Bloom diskoak. Durangoko jazz-abeslariak 2024an kaleratutako bigarren lana aurkezten jarraitzen dau udako biraren barruan, Euskal Herriko eta Estatuko hainbat agertokitan. Abeslariaren esanetan, Bloom aurreko lanarekiko bilakaeraren isla da. Konposizino propioek pisu handiagoa dabe, moldaketak landuagoak dira eta haizezko instrumentuak gehitzeak soinu aberatsagoa emon deutso lanari. Diskoan jazz klasikoaren eragina manteniduten bada be, gaur egungo kutsua eta estilo personalagoa nabarmendu dauz Bilbaok. Lan barria Aitor Bravo, Mikel Núñez, Fran Serrano, Álvaro Zarzuela eta Xabier Arriolarekin osotutako boskoteagaz defendatzen ari da zuzenean. Abeslariak azaldu dauenez, musikarien arteko konfiantzak eta jazzaren berezko inprobisazioak kontzertu bakotxa esperientzia bakar bihurtzen dau. Diskoko berezitasunetako bat 'Mendian gora' da, euskeraz grabadutako abesti bakarra. Imanol Larzabalen kanta hori Euskal Herritik kanpo eskaintzen hasi zan, eta publikoaren harrerak diskoan sartzera bultzatu eban. Bilbaoren esanetan, bereziki hunkigarria izan da ikusleek abesti horregaz sortu daben lotura. Udako birak Lekeitio, Durango, Leon, Buron eta Zornotzako emonaldiak izango dauz hurrengo asteetan

Etxartekin batera Hapa-Hapa taldea, Dominika Eiheraberri, Robert Larrandabürü, Anje Duhalde, Peio Artabe edo Anne Bidalun izango dira oholtza ganean

Thu, 16 Jul 2026 10:05:03 +0000

Zemendiaren 21ean Muxikebarri zentroan izango dan emonaldiak Zuberoako musikariaren 50 urteko ibilpidea omenduko dau. Getxoko Udalak eta Euskal Kultur Erakundeak (EKE) alkarlanean antolatu dabe ekitaldia, Iparra Galdu Gabe jardunaldien 25. urteurrena ospatzeko eta Iparraldearen eta Hegoaldearen arteko lotura kulturalak sendotzen jarraitzeko. Gorka Mostajo Getxo Kulturako presidenteak azaldu dauenez, Niko Etxart aukeratu dabe euskal musikearen erreferente nagusietako bat dalako eta 1970eko hamarkadan rocka eta euskal doinu tradizinonalak buztartu ebazan aitzindarietako bat izan zalako. Gainera, Mostajok gogorarazo dau Iparra Galdu Gabe jardunaldiak orain dala 25 urte Etxartekin abiatu zirala, eta urteurrena ospatzeko omenaldia egitea "oso naturala" izan dala. Kontzertuak artista ugari bilduko dauz oholtza berean. Niko Etxartekin batera ariko dira, besteak beste, Hapa-Hapa taldea, Xabi Leon, Dominika Eiheraberri, Robert Larrandabürü, Anje Duhalde, Peio Artabe, Anne Bidalun, Irantzu Garamendi eta Ainhoa Aranburu. Gainera, EITBk emonaldia grabaduko dau. Astebete geroago, zemendiaren 28an, Donibane Lohizuneko Tanka aretoan be izango da kontzertuaren erreplika. Mostajoren esanetan, Iparra Galdu Gabe jardunaldiek 25 urte hauetan musikea, literaturea, arte eszenikoak, bertsolaritzea eta familiei zein gazteei zuzendutako jarduerak buztartu dabez, beti be, Iparraldearen eta Hegoaldearen arteko harremanak indartzeko helburuagaz. Kontzerturako sarrerak garagarrilaren 27tik aurrera jarriko dira salgai Getxo Kulturaren ohiko salmenta-kanalen bidez.

Herritar guztiak konbidau dabez ospakizunagaz bat egitera

Fri, 10 Jul 2026 14:14:26 +0000

Bermeoko Alkartasuna Dantza Taldeak 50. urteurrena ospatuko dau bihar, ekitaldi berezi bategaz Artza frontoian. Gaueko 21:00etan hasiko dan ikuskizunean, belaunaldi ezbardinetako dantzari eta musikariak alkartuko dira, taldearen ibilpidea gogoratzeko. Emonaldian Euskal Herriko zazpi lurraldeetako dantzak, musika eta taldearen historiaren errepasoa izango dira protagonista. Gaizka San Pedro taldeko lehendakariaren esanetan, 50 urte hauetan lortutakoa ospatzeko eta dantza tradizinonalaren transmisinoari balioa emoteko aukera izango da urteurrena. Horregaitik, herritar guztiak konbidau dauz ospakizunagaz bat egitera, dantza, musika eta oroitzapenez beteriko gau berezi batez gozetako.

Hitzaldiak hausnarketarako eta herritarren arteko alkarrizketarako gunea eskaini gura dau

Thu, 09 Jul 2026 13:10:03 +0000

Gaur, arratsaldeko zazpietan, Bakioko Txakolingunean, Euskal Herriaren pizkunderako erronkak izeneko hitzaldia eskainiko dau Koldo Zaratek, Labayruko kideak. Hitzaldian euskeraren egungo egoera aztertuko da, azken urteetako geldialdiaren arrazoiak eta etorkizuneko erronka nagusiak mahai gainean jarriz. Besteak beste, digitalizazinoak, sare sozialen eraginak, migrazinoaren testuinguru barriak eta herri euskaldunetako bizikidetza izango dira hizpide. Zarateren esanetan, euskeraren erabilera sustatzeko, ezinbestekoa izango da errealidade barrietara egokitzea eta gazteen ohiturei arreta berezia eskaintzea. Hitzaldiak hausnarketarako eta herritarren arteko alkarrizketarako gunea eskaini gura dau, euskeraren etorkizuna indartzeko bideak alkarregaz aztertzeko. Makatzeko Iturria kultur alkarteak antolatu dau berbaldia.

Jaialdiak hamar kontzertu eskainiko dauz Busturialdeko sei udalerritan

Wed, 08 Jul 2026 12:44:54 +0000

Urdaibaiko Organoak – Joxe Mari Eguileor jaialdiak 22. edizinoa egingo dau garagarrilaren 11tik abuztuaren 15era bitartean, 'Organoa, museo bizia' lelopean. Aurten, barrikuntza nagusia, Gernika-Lumoko Santa Klara komentuko organu zaharbarrituaren estreinaldia izango da. 1910ean eraikitako tresna historikoa lehenengoz izango da jaialdiaren programazinoaren parte. Jaialdiak hamar kontzertu eskainiko dauz Busturialdeko sei udalerritan, eta musika emonaldiez gain, 'Urdaibaiko Soinuak' erakusketa, bisita gidatuak eta mahai-inguru bat be antolatu dabez. Antolatzaileen esanetan, helburua ez da bakarrik kontzertuak eskaintzea. Urdaibaiko organu-ondarea berreskuratu, zaindu eta herritarren artean ezagutarazotea be gura da. Joxe Benantzik Lau Haizetara saioan nabarmendu dauanez, organoak ez dira museoan gordetako piezak, bizirik dagozan musika-tresnak baino. Horregaitik, zaharbarritze bakotxa ondarearen aldeko urrats garrantzitsua dala eta kontzertu bakotxa tresna horreei barriro ahotsa emoteko aukera dala azpimarratu deusku Urdaibaiko Organoak - Joxe Mari Eguileor zikloko koordinatzaileak.

Antolatzaileek azken urteetan martxan jarritako barrikuntzei eutsiko deutsee

Mon, 06 Jul 2026 12:33:28 +0000

Itxas Soinua Nazinoarteko Musikaldia garagarrilaren 10etik 17ra egingo da. Aurreko urteetan lez, atal nagusi bitan banatuko da: Gau Klasikoak, garagarrilaren 10etik 12ra Andra Mariaren Zeruratzea Basilikan, eta Gau Modernoak, garagarrilaren 16an eta 17an, Ikusgarri Zineman. Antolatzaileek azken urteetan martxan jarritako barrikuntzei eusten deutse. Oihana Etxabe Itxas Soinuak jaialdiko koordinatzaileak Lau Haizetara saioan azaldu dauanez, besteak beste, marka eta webgune barria mantenduko dabez, musika-estilo desbardinak buztartzen dauzan programazinoa eskainiko dabe eta Euskal Herriko musikari gazteei protagonismoa emoten jarraituko dabe. Helburua publiko barriak erakartzea eta jaialdia gero eta edegiagoa izatea da. Horrez gain, abonuen eta deskontuen sistema be mantenduko da, gazteek eta musikazaleek kontzertuetara errazago joateko aukera izan dagien. Sarrerak jaialdiaren webgunean eta Lekeitioko Turismo Bulegoan eskuratu ahal izango dira.

Osasun publiko eta pribaduaren ganeko hausnarketea dakarre

Fri, 03 Jul 2026 11:23:13 +0000

Barsanti antzerki konpainiak Zarautzen estreinauko dau bihar Kodizia Late Night antzezlan barria. Talde honen bosgarren antzezlana da honakoa. Barsantiren ezaugarrietariko bat da gizartean pil-pilean dagozan gaiak lantzea. Oraingo honetan, osasun publiko eta pribaduaren ganeko hausnarketea dakarre. Aritza Rodriguez, Juanjo Otero eta Pako Revueltas aktoreak arituko dira kale antzerki honetan. Izenburuak dinoan moduan, telebistako late night saio bat da ardatz antzezlanean. Horrez gain, beste istorio bat tartekatzen da, pertsonai biren artekoa. Euretariko baten erabagiak kalte egingo deutso bestearen senitarteko bati.

Gaueko kale antzerkia

Gauez eskaintzeko antzezlana sortu dabe oraingoan. Orain arteko kale ikuskizunak, egunez eskaini dabez. Dinoenez, helduentzako antzezlana da. Umeak joan ezkero, familian joatea gomendatzen dabe. Eszenografiari jagokonez, espazio eszeniko berezia daukala azaldu deusku Rodriguezek. Harmaila bi jarriko dabez publikoarentzat eta eurak erdian arituko dira. Gaur Zigoitian eskeiniko dabe antzezlana eta bihar izango da estreinaldia Zarautzen. Hileon, Sopelan izango dira hilaren 18an, Amorebieta-Etxanon 22an eta Arrigorriagan 24an.

Izen handiak eta askotan entzuten ez direnak egitarauan

Wed, 01 Jul 2026 11:15:17 +0000

Musikaire jaialdiaren 26. edizinoa ospatuko da Elorrion garagarrilaren 3tik 26ra bitartean. Musikea, antzerkia eta dantzea izango dira aurten be. Elorrioko Arriola antzokia da antolatzailea. Aitor Iriarte programatzaileak esan deusku herritarrak eskertuta dagozala eta jaialdiaren zain.

Kalidadeko egitaraua

Egitarauari jagokonez, izen handiak dagoz kartelean baina baita asko entzuten ez direnak be. Antolatzaileen esanetan, kalidadeko egitaraua eskaintzea izaten da euren helburu nagusia. Hasteko, bariku honetan, Porrotx, Marimotots, Pupu eta Lore izango dira Elorrion. Zerua lapurtu dute eskeiniko dabe. Honeen emonaldia klasiko bat bihurtu da Musikaire jaialdian. Sara Zozaya, Euskal Barrok Ensemble, Ruper Ordorika, Momi Maiga, Robbin Kapsalis edo Elkano Browning Cream talde eta bakarlariak arituko dira garagarrilean zehar. Antigua Fusion Con Miel y Canelaren emonaldia azpimarratu dau Aitor Iriarte programatzaileak. Elorrio jaialdirako sortu daben ekitaldia eskeiniko dabe. Dantzea be izango da hilaren 19an. Lau pieza labur eskeiniko dira, dantza garaikidea. Doako saioak izango dira guztiak ,eta emonaldiak Elorrioko gune desbardinetan izango dira. Euria egin ezkero, Arriola antzokira lekualdatuko dira emonaldiak.

Musika historikoaren eta kultur ondarearen aldeko apustua berretsi dabe aurten

Tue, 30 Jun 2026 11:52:43 +0000

Antolatzaileek azaldu dabenez, XXXVIII. Ziortzako Kontzertuak jaialdiak nazinoarteko eta bertako artista ospetsuak bilduko dauz, historikoki informautako interpretazinoak eta kalidade handiko egitaraua eskainiz. Kontzertuak Ziortzako monasterioan egingo dira, akustika bikainagaitik eta bertan dagoen Euskal Herriko organurik zaharrenetakoagaitik (1686an Joseph de Echevarriak eregitakoa) ezaguna dan espazioan. Eta ezin ahaztu, eleizan bertan dagoan Jose Maria Arrizabalagaren beste organua be (1993), zaharraren irudi eta antzera eregitakoa. Koldo Narbaiza antolatzaileak Lau Haizetara irratsaioan nabarmendu dauanez, jaialdiaren helburua musika eta ondare historikoa buztartzea da, eta publikoari esperientzia berezia eskaintzea. Urtero lez, aurten be ikusle ugari erakartzea itxaroten dabe. Kontzertuak irailean izango dira, zehazki, bigarren eta hirugarren astegoienean. Organu kontzertuak, Erdi Aroko musika eta obra bereziak izango dira, besteak beste.

Publikoak aplikazino barri baten bitartez bozkatu ahal izango dau

Fri, 19 Jun 2026 11:44:36 +0000

Nazinoarteko 10 talde arituko dira lehian astegoien honetan, Amorebieta-Etxanoko Haizetara musika jaialdian. Hemeretzigarrenez egingo da Haizetara jaialdia Zornotzan gaurtik domekara bitartean. Herriko kaleak, erritmoz, kolorez eta energiaz beteko dira. Herritarrak eta ingurukoak jaialdiaren zain egoten dira. Musika taldeak be. Aurten 50 eskaera jaso dabez eta honeetatik hamar aukeratu dabez. Koldo Bilbao kultura zinegotziak azaldu deuskunez, ahalegintzen dira estilo eta herrialde desbardinetako partaideak aukeratzen eta talderik ez errepikatzen.

Aplikazinoa aurten

Frantziako Pierres & Fils, Les Rogers Brass Band eta Super Panela, Belgikako Banda Quetzal, Italiako Seven Seas Orchestra, Madrilgo Mamabrass eta Los Justicieros, Vigoko Fanfarria Taquikardia eta Hungariako Forbi Brass Band taldeak dira Zornotzako kaleetan arituko diranak Haizetara jaialdian. Bakotxak lau emonaldi eskeiniko dauz. Profesionalez osotutako epamahai batek aukeratuko dau banda onena. 15.000 euro jasoko dauz. Instrumentista onena be aukeratuko da eta publikoak be talde onena aukeratzeko erea izango dau. Aurten, nobedadea da, aplikazinoa sortu dabela herritarrek bozkatzeko. Aurrez aurre be bozkatu ahal izango dabe Zelaietan. Aplikazinoan egitaraua be izango da, besteak beste. Sariak domeka eguerdiko ordubatetan bananduko dira. Lehiaketeaz gain, aurten, hirugarrenez, euskal taldeak be arituko dira; Sugarri, Malatxo, Incansables, Mauxitxa, Sama Siku eta Zornotzako Musika Banda. Era honetara, programazinoa zabaltzea lortzen dabe, Euskal Herriko taldeak aritzea eta herritarrak jaialdira hurreratzea. Haizetara jaialdiagaz lotuta, Zelaieta Zentroan Aerofonoak: Munduko Haizeak izeneko erakusketea be ikusgai dago garagarrilaren 3ra bitartean.

Bederatzigarren bira dagoz eskaintzen

Thu, 18 Jun 2026 11:51:48 +0000

Harrera beroa jaso dau Gure Zirkuak Bermeon. Hilaren 12an heldu zan Gure Zirkua Bermeora eta 28ra bitartean jarraituko dau bertan, hamaika emonaldi eskainiz guztira. Bost urteren ostean bueltatu dira Busturialdera. Bederatzigarren biran dagoz sartuta. Olaberrian eta Oñatin eskeini dabez lehenengo saioak, eta aurreko astetik Bizkaian dagoz. Harrera oso ona izan dabe orain arte leku guztietan. Gure Zirkuaren arrakastaren arrazoia, lana dala esan deusku gaur Iker Galartzak, ekimen honen sortzaile eta partaideak.

Xaribaria

Bederatzigarren bira honetan, xaribariari egiten deutse erreferentzia. Herri antzerki mota izan zan honakoa, dantzea, musikea, kantua, bertsoak eta antzerkia buztartzen ebazana. Epaiketa baten itxureagaz, gizarte-kritika zorrotza egiten zan. Mundu gero eta nahasiago eta ilunago baten gagozala esan daiteke eta xaribariagaz, alkarregaz, lagunartean, une koloretsu, alai eta baikorra eskeini gura dabe. Igazko partaideak mantentzen dira Gure Zirkuan. Harrobi modura funtzionetan jarraitzen dauala esan deusku Galartzak. Gaur bertan, Bermeon, 40 bat ume hurreratu direla adierazi dau. Publikoari jagokonez, askok errepikatzen dabela esan behar, eta gero eta heldu gehiago hurreratzen direla be. Gogoratu daigun, familia osoarentzako ikuskizuna eskaintzen dabela. Bermeon amaitu ostean, Lekeitiora joango da Gure Zirkua garagarrilean. Eskaeren arabera aukeratzen dabe nora joan. Nafarroara bidean, Abadiñon be egingo dabe geldialdia aurten.

Aian aurkeztuko dabe zuzenean bagilaren 19an

Wed, 17 Jun 2026 11:36:37 +0000

Oskarbi taldeak 60 urte bete dauz. Gipuzkoa Donemilia diskoa aurkeztu dabe. Donostian egin zan atzo iluntzean aurkezpena. 1966. urtean sortu zan Oskarbi. Joxelu Treku eta Iñaki Maritxalar izan ziran sortzaileetariko bi, oraindino taldean mantentzen direnak. Trekuk gaur azaldu deuskunez, garai hartan, hutsunea egoan euskal kulturan, diktadura garaia zala kontuan hartuta. Ez Dok Amairu taldean izan ziran. Bertan egotea, ikasketa handia izan zala aipatu dau Trekuk. Sustraietara joko ebela argi izan eben. Bide barriak jorratu ebezan, jazz edo gospel estiloak euskal tradizinoagaz buztartuz. Era horretara aritzea, inkonzientea izan zala esan deusku Joxelu Trekuk. Jorge Oteiza eskultoreagaz edo Bitoriano Gandiaga idazleagaz izandako harremana be gogoratu dau. Lehenengoaren bitartez ezagutu eben bigarrena. 60 urteko ibilbidearen ostean, Oskarbi taldea, "relikia barritua" dala esan deusku Trekuk.

Abestia Gipuzkoari

60. urteurrena ospatzeko Gipuzkoa Donemilia diskoa argitaratu dabe. Euren 13. lana da eta hamaika kanta daukaz. Mila urte betetan dira Gipuzkoa berbea sortu zanetik eta kantua eskeini deutse. Mila urte betetan dira era berean Donemiliako lehen esaldiak idatzi zirela. Perutxoren kantua eta Bernat Etxepareren kantuia kantuak sortu ziranetik 500 urte bete dira eta barrituta dakarrez honeek. Gauza bera esan daiteke, Kattalin Ttirun Ttarun eta Adizan Gabriela abestietaz. Honeek berreskuratu eta barrituta dakarrez. Disko guztietan lez, Ez Dok Amairu taldeari omenaldia eskaintzen deutse garaiko kantuak sartuta. Oraingo honetan Tiriki Trauki, Oi Pello Pello eta Globo Gorri kantuak aukeratu dabez. Oskarbi taldeak Aian eskeiniko dau lehenengo kontzertua barikuan, disko barria aurkezteko. Irailaren 26an Arantzazun daukie kontzertua. Pasaian izango dira zemendian eta abenduaren 12an Donostian. Azken hau, kontzertu nagusia izango da. Besteak beste, Antton Valverde eta Gorka Knöor izango dira gonbidatuetariko batzuk.

Urkiolan egin zan diskoaren aurkezpena bagilaren 13 eta 14an

Tue, 16 Jun 2026 11:43:43 +0000

Aiko taldeak 20 urte bete dauz. Zeu izeneko diskoa kaleratu dabe urteurrena ospatzeko. Urkiolan egin zan disko barriaren aurkezpena aurreko astegoienean, San Antonio egunean eta honen errepetiziñoan. Hainbat lagun batu zan antolatutako entzunaldian. 2006. urtean sortu zan Aiko taldea. Euskal musika eta dantza tradizionalaren transmisinoan, ikerketan, sorkuntzan eta sozializazinoan aritu dira ordutik. Erromeriak, ikastaroak, dokumentalak, argitalpenak eta diskoak sortu dabez, besteak beste. Hogei urteko ibilbidea positiboa dala esan deusku Aiko taldeko Sabin Bikandik. Ingurua zeozer eraldatu dala azpimarratu dau. Aiko sortu zan momentuan holango talde baten beharra egoala esan deusku Sabin Bikandik. 20 urteko ibilbidea eginda, erreferente bihurtu direla esan daiteke. Ikusten daben hutsunetariko bat, unibertsidadean dago. Bikandik dino, unibertsidadean be dantzea sartu beharko litzatekeela.

Disko berezia

Zeu diskoa, Alvaro Garcia eta Sabin Bikandiren artean sortu da. Hamabi pieza daukaz, dantzarako modukoak danak. Pandemian hasi ziran sortzen eta bidea luzea izan dan arren, diskoa, berezia da Bikandiren esanetan. Pozik dagoz emaitzea ikusita. Zeu diskoa aurkeztuta, hileon, Arratiako Ondare Astegoiena antolatu dau Aikok Areatzan, Areatzako Udalagaz alkarlanean. Lehenengoz egingo da eta asmoa urtero errepikatzea da. Dantzea izango da nagusi baina, bertsolaritza edo kantuari eskaintzea be aurreikusten dabe hurrengo edizinoetan. Bagilaren 27 eta 28an egingo da Arratiako Ondare Astegoiena.

Bagilaren 23ra bitarteko epea dago izena emoteko

Mon, 15 Jun 2026 11:59:24 +0000

Abian da Abestu Euskadiko Orkestrarekin ekimena. 132 ahots behar dabez aurten. Hirugarrenez egingo da ekimen hau. Profesionalak ez diren abeslariek, aukerea daukie Euskadiko Orkestragaz batera aritzeko. Kontzertuak zemendian izango dira Bilboko Euskalduna Jauregian, Donostiako Kursaal jauregian eta Iruñeako Baluarten. Orain arteko edizino bietan, harrera oso ona izan dau ekimenak parte-hartze kopuruari jagokonez eta publikoari jagokonez. Euskadiko Orkestratik Jose Inazio Usabiaga zuzendari teknikoak azaldu deusku orkestra inklusiboa izateko bidean hartu eben erabagia izan zala ekimen hau. Abesbatzetan ari diranei begira edo kantatzea gustokoa dabenentzat dago zabalik egitasmoa.

Izena emon

Ekimenean parte hartu gura daben herritarrek bagilaren 23ra bitarteko epea daukie. Webgunean emon behar dabe izena. Ezinbestekoa da gitxieneko musika-prestakuntza bat izatea. Ostean, zozketea egingo da. Aukeratutako herritarrek, 10 entsegu izango dabez irailaren 16tik zemendiaren 20ra bitartean. Lehenengo hirurak Bilbon izango dira, Juan Crisostomo de Arriaga Kontserbatorioan. Gainontzekoak Miramonen izango dira. Iñaki Arkotxa bizkaitarrak aurreko edizino bietan hartu dau parte. Irakaslea da bera lanbidez eta musikan aritutakoa, baxu-jolea da hain zuzen. Kantatzera animau zala esan deusku eta asko gozatu dauala orain arte. Lehenengo edizino bietan hartu dau parte eta hirugarren honetarako izena emon dau dagoeneko.

Errepertorioa

Zuzeneko emonaldiak zemendiaren 24an hasiko dira Iruñean. Bilbon, hurrengo egunean izango dira eta Donostian zemendiaren 26 eta 27an. Errepertoroari jagokonez, aurten, lehenengoz, zarzuela bat eskeiniko dabe, Amadeo Vivesen Doña Francisquita. Bestelakoan, errepertorioan beti egoten dira euskal sortzaileak eta opera sortzaileak. Aurten, Iparragirre eta Sorozabalen Hara nun diran eskeiniko dabe eta Verdiren Lombardi operea aukeratu dabe. Euskadiko Orkestraren 2026/2027ko denboraldiaren barruan sartuko diran emonaldiak izango dira honako honeek. Denboraldi barria laster aurkeztuko dabe.

Hurrengo Korrika Kulturaleko ikuskizun nagusia izango da

Thu, 11 Jun 2026 11:43:58 +0000

Metrokoadroka konpainiaren Laster eroriko da antzezlanak jaso dau aurten AEK-Korrika Sorkuntza Beka. 23.000 euroko laguntzea emongo deutse konpainiari antzezlana sortzeko. AEK-k hirugarrenez emon dau aurten beka hau. Euskal kulturgileek sortutako euskerazko ekoizpenak bultzatzeko jarri eben abian laguntzea. Metrokoadroka konpainiatik Oier Guillanek esan deusku, pozik eta arduraz jaso dabela bekea. Laster eroriko da komedia bat dala esan daiteke. Hori bai, gauza serioak kontetako komedia. 99 urte betetzera doan aitona da istorioan protagonistetariko bat. Bere ilobak, bazkari bat antolatzen hasten dira aitonaren omenez. Kontua da ez dakitela kozinetan eta euskal kanta klasikoen barri be ez daukiela. Belaunaldien arteko transmisinoa eta komunidadearen ganeko hausnarketea egin gura dabe antzezlanaren bitartez.

Antzezlana eta bazkaria batera

Gorka Knorren Agure Zaharra eta Lluis Llachen L’Estaca kantuetatik atara dabe antzezlanaren izenburua. Abesti honeek askotan entzuten dira bazkalosteetan. Asmoa, publikoaren parte hartzea sustatzea da eta ahal dan lekuetan, bazkariak antolatuko dabez antzezlanagaz batera. Publikoa eszenografiaren parte izatea gurako leukie. Idoia Beratarbide izango da Laster eroriko da lanaren zuzendari artistikoa eta Oier Guillan dramaturgiaren arduraduna. Apurka-apurka, antzezlana osotzen joango dira egonaldien bitartez besteak beste. Korrika Kulturalaren barruan eskeiniko da lana 2027. urteko zemenditik 2028ko apirilera bitartean. Korrika Kulturaleko ikuskizun nagusia izango da.

Juanjo Mena arituko da barriro Bilboko orkestragaz

Wed, 10 Jun 2026 11:54:17 +0000

Abonadu kopururik handiena izan dauan denboraldia amaituta, Basoa denboraldia aurkeztu dau Bilbao Orkestra Sinfonikoak. 2.586 abonadu izan dauz BOSek 2025/2026 denboraldian, inozkorik gehien. Urrian denboraldi barriari emongo deutse hasierea eta Basoa izena jarri deutse. Bilbao Orkestra Sinfonikoak basoagaz daukan lotureagatik aukeratu dabe izen hau. Iñigo Alberdi zuzendari kudeatzaileak azaldu deuskunez, basoagaz zerikusia daben lanak eskeiniko dira denboraldian zehar.

17 programa sinfoniko

Basoagaz lotuta Oma estreinauko da denboraldi barrian. Maria Eugenia Luc konpositorearen lana. Kortezubin dagoen Omako Basoan inspirautako lana da. Luc inguru horretan bizi zan ganera urte askotan. Bere ahots berezia nabarmendu dau Alberdik. Guernica izeneko operea berreskuratzeko asmoa be badauka BOSek denboraldi barrian. Paul Vidalen lana da eta Parisen estreinau zan 1895. urtean. Opera frantsesa eta era berean euskalduna dala esan deusku Alberdik. Bigarren Karlistaldiko Gernika agertzen da bertan. Basoa denboraldian BOSegaz batera arituko diranen artean, Juanjo Mena azpimarratu behar da. 1999 eta 2008. urteen artean zuzendari titularra izan zan. Gonbidatu berezia izango da Alberdiren esanetan. Denboraldi barrian, besteak beste, sormen lan garaikideak be eskeiniko dira, Eduardo Soutullorena adibidez. Bethoovenen bigarren mendeurrena ospatzeko barriz, Eneko Sagardoy aktorea arituko da orkestragaz batera. Leire Bilbao idazlea be izango da BOSegaz denboraldi barrian. Abonu kontzertu bakotxeko olerki bat sortuko dau Bilbaok. ZinemaBOS ekimena be ez da faltako. Oraingoan ET filmearen soinu bandea eskeiniko dabe zuzenean, John Williamsena. Gabonetan izango da honakoa, urtarrilaren 7an, Euskalduna Jauregian. Bilbao Orkestra Sinfonikoa Bizkaiko herrietara hurreratuko da, Donostiako Hamabostaldian be izango da, Santanderreko nazinoarteko jaialdian, Musika-Musica jaialdian edo Ura Bere Bidean moduko ekimenean. Denboraldi barria 2026ko urriaren 1ean hasiko da eta 2027ko bagilaren 11an amaitu. Iñigo Alberdi zuzendari kudeatzailearen esanetan, erronkarik handiena, zuzendari titularra aukeratzea izango da.

Kulturara heltzeko dagozan oztopoak gainditzeko sare sendo baten beharra aldarrikatu da

Tue, 09 Jun 2026 11:35:30 +0000

Gertu Kultura Bizkaia ekimenak antolatuta, kultur eskubideen ganeko jardunaldia egin da gaur Bilbon. BBK Aretoan mahai-inguruak eta berbaldiak eskeini dira goiz osoan. Urtea bete dau Gertu Kultura Bizkaia ekimenak. Bizkaiko Foru Aldundiak eta BBKk jarri eben abian, Bilboko Udala eta Eusko Jaurlaritzaren laguntzeagaz. Zaurgarritasun egoeran edo gizarte bazterketea jasateko arriskuan dagozan pertsonak, kulturara heltzeko eta kulturan parte hartzeko daukiezan oztopoak ezabatzen saiatzen da Gertu Kultura Bizkaia. Mirari Garcia, bitartekaritza arduradunak azaldu deuskunez, programa bat daukie horretarako eta erantzun ona izan dau orain arte. Kulturara heltzeko pertsona honeek topetan dabezan oztopoen artean, ekonomikoa litzateke nagusienetariko bat. Oztopo fisiko eta sensorialak be badagoz eta gizarte oztopoak.

Jardunaldia

‘Kultura zurea da. Zure eskubidea da’ lelopean jardunaldia egin da goizean zehar BBK Aretoan. Kultur eskubideak aldarrikatzea izan da ekimen honen helburu nagusia. Erakundeetako ordezkariek emon deutse hasierea gaurko jardunaldiari, Amaia Antxustegi Gizarte Ekintza Foru Diputadua eta Leixuri Arrizabalaga Euskera, Kultura eta Kirol Foru Diputadua tartean. Sare sendo bat osotzearen alde azaldu dira, dagozan oztopo guztiak gainditeko. Mahai-inguru, aurkezpen eta solasaldi desbardinen bitartez, kultur eskubidea zer dan aztertu dabe. Erakundeetako ordezkariez gain, kultura arloko profesionalak, gizarte eragileak, giza eskubideetan adituak diren pertsonak eta gizarte erakundeetako erabiltzaileak batu dira bertan. Gertu Kultura Bizkaiak, dinamika desbardinak antolatzen dauz. Hileon, formakuntza saioa eskeiniko dabe Once erakundeagaz Bilboko Euskalduna jauregian.

Bizkaitar musikari biek sari bana jaso eban Biarritzen aurreko astean

Mon, 08 Jun 2026 11:34:13 +0000

Musika Bulegoa Sariak irabazitako Jon Saenz eta Maite Ruiz de Erentxun bizkaitarrek, bat egiten dabe Fermin Muguruzak egindako kritikeagaz. Bagilaren 4an banandu ziran Musika Bulegoa sariak Biarritzen, Atabal aretoan. Jon Saenz getxoztarrak, Exodus obra musikalagatik jaso dau saria eta Maite Ruiz de Erentxun lekeitiarrak bere izena daroan diskoagatik. Biek bat egin dabe Fermin Muguruzak, saria jasotzerakoan berak be, esan ebazanakaz. Muguruzak erakundeek ETS musika taldeari emondako diru-laguntzea kritikatu eban. Musikari bizkaitarrak bat datoz kritika honegaz. Besteak beste, talde handiei diru asko emoten jakiela esan dabe eta talde txikiei diru gitxi.

Sariak indarra emon

Jon Saenzen Exodus obra musikala Bilboko Arriaga antzokian estrenau zan igaz. Opera esperimental modura definitzen da lan hau. Berak dino ez dala betiko opera bat. Akelarre Abesbatza, Lander Otaola eta Ensemble Sua taldeko musikariak dira Exodus operan, taula ganean ikusten doguzanak. Hegoa Alvarez Zorrozarena da libretoa, Sainzen bidelaguna, Ane Legarreta da zuzendari musikala eta Marta Eguilior zuzendaria. Momentuz, Arriagan baino ez dau eskaini Exodus. Maite Ruiz de Erentxun lekeitiar akordeoilaria Bartzelonara joan zan musika ikasketak egitera. Bertan sortu dau bere izena daroan diskoa, ikaskideakaz batera. Lan hau, dagoan ordenan entzun behar dala dino. Euskal musika tradizionala eta jazz garaikidea buztartzen dauz, akordeoia eta jazza. Diskoa zuzeneko batzuen bitartean aukeratu ahal izan dau. Horretarako boskotea osotu dau Aura Martin, Christopher Perez, Alesander Peña eta Manuel Luquegaz. Jon Saenz eta Maite Ruiz de Erentxun pozik dagoz Musika Bulegoa saria jasota. Sari honek, musikagintzan jarraitzeko indarra emoten deutsiela esan deuskue.

Joseba Sarrionandiak idatzitako 'We are plenty in here Euzkadin eginak' liburua dago proiektu honen oinarrian

Fri, 05 Jun 2026 14:20:01 +0000

Luhartz taldeak proiektu barria atondu dau: Simon Sam Gandarias (1897-1949) bertsolari eta artzain bizkaitarrak Ameriketako Estatu Batuetan idatzitako bertso-paperak musikatu dauz. Bagilaren 7an proiektua aurkezteko kontzertua eskainiko dabe Durangoko Plateruena kultur aterpean (19:00etan). Sarrerea librea da, leku bete arte. Rafa Iriondo Luhartz taldeko kideak azaldu dauanez, proiektuaren sorburua Joseba Sarrionandiak Gandariasen inguruan egindako ikerketa da. Iurretako idazleak Gandariasek itxitako bertso sortak eta istorioak bildu dauz We are plenty in here Euzkadin eginak liburuan. Eta Sarrionandiak berak proposatu eutsan Luhartz taldeari bertsoakaz zeozer egitea. Plateruenako emonaldia kontzertu narratiboa izango da. Musika ez eze, Gandariasen testuingurua eta historia be azalduko deutsez publikoari.

23. bidaia Ameriketara Maiatza amaieran Luhartz taldea Kaliforniako Bakersfield uriko jaialdian izan zan. Euskal diaspora zabala dago bertan. han. Luhartzek AEBetara egiten dauan 23. bidaia izan da honakoa. Iriondok nabarmendu dau euskal kultura eta nortasuna bizirik mantentzeko egiten daben lana balio handikoa dala.

Leioako Umore Azokan eskeini eben kaleko bertsinoa

Tue, 02 Jun 2026 11:43:45 +0000

Ixo Teatro konpainiak Harea antzezlana eskeiniko dau lehenengoz areto barruan Bilboko Pabellon 6 aretoan. Leioako Umore Azokan estreinau eben aurreko hilean eta etzi izango da areto barruko estreinaldia. Luix Mitxelena eta Arnatz Puertas dira Ixo Teatroa konpainiaren sortzaileak eta biak dira Harea antzezlaneko protagonistak be. Mitxelenak esan deuskunez, gogotsu dagoz, areto barruko estreinaldiari begira.

Tragikomedia

Komedia bat izan behar zan hasieran Harea, baina tragikomedia bat da azkenean. Hegazkin-istripua daukien gazte bi dira protagonista. Uharte bakarti baten amaituko dabe nora jo ez daukiela. Euren artekoa hankaz gora jarriko da lehenengo frutea erortzen danean. Mitxelenak dino anbizioaz aritzea izan zala euren asmoa. Ixo Teatro konpainiak berbarik gabeko antzezlanak sortzen dauz. Honakoa, sorkuntza kolektiboa izan dala esan deusku Mitxelenak. Estitxu Zalduaren kanpoko begiradea izan dabe zuzendaritzan. Javier Tirado arduratu da bestalde eszenografiaz, eta Betitxe Saitua jantzietaz. Adrian Garcia de los Ojosek antzelan honetarako musikea sortu dau, anaitasuna irudikatuz baina tragedia bilakatzen dan doinua bihurtuz. Kaletik antzokira igarotzerakoan, antzezlan luzeagoa izango da. Bagilaren 4an eskeiniko dabe Harea Pabellon 6 aretoan eta beste hiru emonaldi gehiago izango dira barikuan, zapatuan eta domekan.

Hamalau talde arituko dira

Mon, 01 Jun 2026 11:48:42 +0000

Bagilaren 5ean hasiko da bosgarren Bizkaiko Taldekako bertsolari txapelketea. Hamalau taldek emon dabe izena aurten. Arrigorriagan eta Algortan izango dira barikuan lehenengo saioak. Bizkaiko bertsolaritzaren oinarria eta eskualdeak aktibatu eta indartzea da helburua. Bizkaiko Bertsozale Elkartetik, Ione Narbaizak azaldu deusku, urte birik behin egiten dala Bizkaiko Bertsolari Txapelketea eta urte birik behin honako txapelketea. Azken hau, besteak beste, bertsotan bere lekua topau ez dabenei begira be antolatzen dabe.

Bost kanporaketa

Taldeak, gitxienez 6 lagunekoak izan behar dira eta gehienez 8-10 lagunekoak. Talde barruan 3 bertsolari izango dira, epaileak, gai-jartzaileak eta antolatzaileak be. Parte hartzaileen perfila anitza da. Oso gazteak dagoz, beteranoak, aspaldi bertsotik aparte ibili direnak, hasi barriak, sekula parte hartu ez dabenak... Bost kanporaketa jokatuko dira guztira bagilaren 5etik 12ra eta bakotxean hiru talde arituko dira. Arrigorriagan eta Algortan ez eze, Leioan, Gernika-Lumon eta Urdulizen izango dira kanporaketak. Saio informalak izaten dira. Kanporaketa bakotxean taldeen esku geratuko da ariketak adostea. Irailaren 12an jokatuko dira Bizkaiko Taldekako bertsolari txapelketako finalaurrekoak eta finala. Egun horretan, Bizkaiko Bertsozale Elkartearen eguna be ospatuko da. Momentuz ez dabe zehaztu non izango dan. Txapelketa honetarako eta finalerako ez da sarrerarik ordaindu behar. Egun horretan egingo dan bazkarirako txartelak laster jarriko dabez salgai. Informazino guztia www.bertsozale.eus atarian.

Hiru proposamen hiru egunetan

Fri, 29 May 2026 11:47:22 +0000

Hiru ikuskizun eskeiniko dira Bilboko Fundicion aretoan gaurtik domekara bitartean, Zer(K)nias zikloaren barruan. Programa honen bidez, Deustun dagoan areto honetan, Euskal Herrian sortutako proposamen barritzaileak eskaintzen dira. Euren esanetan, kalidade handiko lanak dira eta ohiko antzerki zirkuituetatik urrun dagozanak. Beraz, Zer(K)nias ekimena, urteroko erakuslehioa da ahots eta sorkuntza modu barrientzat.

3 proposamen

Gaur, hasteko, Olaia Valle dantzari bizkaitarrak Entre mi cuerpo y yo. Llorona, llévame al rio eskeiniko dau. Bakarlari modura sortu dauan lehenengo lana da. Dantza garaikideko pieza bat dala esan deusku. Bere bizitzan ispirazino izandako emakumeen omenez sortu dauan ikuskizuna da. Bere ama, Gloria Fuertes edo Chavela Vargas moduko emakumeak omendu nahi dauz Vallek lan honetan. Berak dantzatzen dauan bitartean, Amaia Santamariak eta Zuhaitz Fernandezek, zuzeneko musikea eskeiniko dabe. Zazpiretan hasiko da gaur emonaldia. Bihar, Raíra Rosenkjar arituko da Fundicion aretoan. Brasilen jaio eta Bilbon bizi dan performerra da Rosenkjar. Tetas izeneko lana aurkeztuko dau. Ikuspegi feminista eta kritiko batetik egindako lana da. Zalantzan jartzen dauz generoari eta botereari buruzko kontaketa hegemonikoak. Desioaz, zaintzaz eta loturen beharraz egindako hausnarketea da. Domekan, Infinitudrama konpainiaren txanda izango da. Maite Aizpurua eta Garazi Navas agertuko dira kasu honetan alkarregaz Adarbakarra izeneko ikuskizunean. Urte bi baino ez daukaz konpainia honek eta hiru ekoizpen sortu dabez. Aizpuruak azaldu deuskunez, Adarbakarra lana, oso zaila da definitzen. Kondaira bat izan zan hizpide. Umorea, poesia bisuala eta musikea buztartzen dira lan honetan. Aizpurua koplari ari dan bitartean, Navas soinujole arituko da. Euskaltasuna, garaikidetasunetik birpentsatzeko hausnarketa modukoa sortu dabe. Zer(k)nias zikloan eskeiniko diran antzezlanak, esan dogunez, ohiko antzerki zirkutuetatik urrun dagozan lanak dira. Onartu deuskuenez, ez jake erreza egiten euren proposamenak programazino desbardinetan sartzea.

200 piezatik gora eukazan eta 40 aukeratu dabez

Thu, 28 May 2026 11:46:14 +0000

Iñaki Garmendia Laja trikitilariak etxean kasetetan grabautako 40 pieza daukazan lan bikoitza aurkeztu da gaur. Laja, Ordu txikitako saioak diskoa aurkeztu dau Elkar argitaletxeak Donostian. Iñaki Garmendiak ordu asko emoten ebazan etxean, entseguak egiten. Saio horreek kasetetan grabatzen ebazan. Jose Luis Garmedia semeak aurkitu ebazan kasete horreek eta orain urte bi hasi ziran grabautakoa aztertu eta digitalizetan. 200 piezatik, 40 aukeratu dabez CD bikoitz honetan kaleratzeko. Anjel Valdés musika aditua arduratu da piezak aukeratzeaz. Esan deuskunez, Lajak egindako lana islatzen da diskoan. Erromeria bat antolatu dabela dino.

Trikitixa kalera ekarri

Iñaki Garmendia 60ko hamarkadan hasi zan musikagintzan. Bere ibilbidean, pandero-jole askogaz aritu zan Laja: Iturbide, Landakanda, Mikel Eguren edo Ziolarre… Zortzi disko argitaratu ebazan guztira. Anjel Valdesén esanetan, bere lana eklektikoa eta zabala izan zan. Ordu txikitako saioak lanerako piezak aukeratzerakoan, Valdések esan deusku oreka bat bilatu dabela. Kalidadea nagusitzen dala be azpimarratu dau. Garmendiaren ardura nagusia erromeriak eskaintzea zan eta ez piezak argitaratzea. Trikitixa kalera ekartea nahi eban. Argitaratu barik geratu diren piezei jagokenez, aurrera begira, diskorik ez da kaleratuko, baina zaleen esku geratuko dira sare digitalaren bidez.

Garagarrilaren 15ean egingo da VI. Festibala Europako Herrien parkean

Tue, 26 May 2026 11:40:38 +0000

Gernika-Lumon garagarrilean egingo dan Haziberri jaialdiareko sarreren erdia saldu da dagoeneko. Garagarrilaren 15ean egingo da seigarren Haziberri festibala Gernika-Lumoko Europako Herrien Parkean. 2021. urtean, pandemia sasoian, egin eben lehenengoz eta urtez urte, garagarrilean parkeak eskaintzen dauan eszenatoki berezian egiten da jaialdia. Silvia Perez Cruz kantautore kataluniarra, Gari & Maldanbera eta Esanezin arituko dira aurten. Hiru belaunaldi eta hiru estilo desbardin. Dana dala, Oier Plaza antolatzaileak esan deusku, euren artean ari bat dagoala. Haziberri jaialdia, bere eszenatokiaz gain, eskaintzen dauan kartelagatik be bereizten da. Igaz, Rozalen aritu zan bertan eta orain urte bi, Gorka Urbizu. Euskal Herriko eta kanpoko musikarien arteko eskaintzea, konbinazino ona dala esan deusku Oier Plazak. Silvia Perez Cruz, aspalditik ekarri gura izan dabe Haziberrira. Egungo musikagintzako ahots artistiko berezienetarikoa da. Bere ibilbidean hainbat aitortza jaso dauz, Goya sari bi besteak beste. Gari & Maldanbera festibalean aritzea ohorea dala azaldu dabe antolatzaileek. Esanezin taldea, jaialdiko ahots gaztea izango da aurten. Ianire Aranzabek gidatzen dauan taldeak hiru lan argitaratu dauz 2021. urtetik.

Dabid Zelaia-Zugadi gogoan

Haziberri jaialdiak Erronka Garbia ziurtagiria dauka. Festibala modu jasangarrienean egitea suposatzen dau ziurtagiri honek. Antolatzaileek, jaialdia, lankidetza sare sendo baten emaitza dala azpimarratzen dabe. Bide horretan, lagun izan daben Dabid Zelaia-Zugadi izango dabe aurten gogoan, hainbat ekimeneko arima, euren esanetan. Baserritik Gernikara alkarteko kide modura, buru-belarri ibili zan Dabid festibalari laguntzen. Sarrerak maiatzaren 20an jarri ziran salgai 38 euroan. Haziberri.eus atarian lortu daitekez. Orain arteko jaialdietan aforoa bete da urtero. Edizino honetarako sarreren erdia saldu da dagoeneko. Gogoratu daigun, sarrerea daukanak, Euskal Herria museoa dohainik bisitetako aukerea izango dauala 2026. urtea amaitu arte.

Palestina, Iran, Maroko, Brasil, Egipto eta Espainiako emakume zuzendarien lanak ikusgai

Tue, 26 May 2026 11:00:32 +0000

Emakumeek egindako Zinema Karabana zikloa hasi da Bilbon. Kultura, Comunikation y Desarrollo edo KCD izeneko gobernuz kanpoko erakundeak eta Bilboko Film Sozialak, Zinema Ikusezinaren nazinoarteko jaialdiak antolatzen dabe Zinema Karabana hau. Hamabosgarren edizinoa da aurtengoa. Astelehenetik barikura bitartean egingo da Bilboko Azkuna Zentroan. Giza eskubideakaz, bardintasunagaz eta gizarte eraldaketagaz konprometituta dagoan zinemaren alde egiten dabe urtez urte. Zinema, tresna erabilgarria dala esan deusku KCD erakundetik Gorka Lopez Arantzamendik.

Filmeak eta solasaldiak

Bost egunez, emakumeek egindako zinema ikusi ahal izango da. Hasteko , ‘Palestina 36’ eskeini da, Annemarie Jacir zuzendari palestinarraren lana. Kolonialismo britaniarrarn kontrako palestinarren 1936ko matxinada kontetan da bertan. Zine emonaldiaren ostean, solasaldiak edo foroak antolatzen dira. Kasu honetan , Nur Haddad ingeniari, artista eta palestinarren giza eskubideen aldeko aktibistak hartu dau parte. ‘Cutting through rocks’ filme irlandarra, Mariam Touzaniren ‘Calle Malaga’, Brasilgo Amazoniako emakumeen kontrako indarkeriaren ganeko ‘Manas’ eta Carla Simonen azken lana, ‘Romeria’, izango dira aurtengo karabanan ikusi ahal izango diren gainontzeko filmeak. Emonaldien osteko foroei jagokenez, aurten, nobedadea dagoala esan deusku Gorka Lopez Arantzamendik. Saio bi izango dira hain zuzen. Emakumeek egindako Zinema Karabana Bilboko Azkuna Zentroan barikura bitartean. 3 euroan dagoz sarrerak salgai, web orrian edo lehiatilan.

Hainbat ikuskizun eskeiniko dira doan

Fri, 22 May 2026 11:43:45 +0000

Amorebieta-Etxanon lehenengoz egingo da gaurtik domekara Amoreszena jaialdia, familia antzerki jaialdia. Hiru egunez, hainbat emonaldi eskeiniko dira doan. 0 eta 12 urte arteko haurrentzako ikuskizunak izango dira. Udala da antolatzailea. Bertatik, Koldo Bilbao kultura zinegotziak esan deusku, aspaldi ohartu zirala, familia osoari eskeinitako ekitaldiek harrera handia daukiela herrian. Era horretara erabagi eben Amoreszena jaialdia antolatzea. Asmoa, kulturearen bidez, gizarte bidezkoago bat eraikiteko balio leikien proposamenak eskaintzea da. Sorpresak izango dirala be esan deusku.

Egitaraua

Gaur arratsaldeko seiretan izango da lehenengo emonaldia Amorebieta Etxanon. Andante eskeiniko dau herrikoa dan Markeliñe taldeak. Zazpiretan, Hortzmuga konpainiaren Alonso, ezinezko mandatuen mezularia izango da herriko plazan eta zortziretan, Zornotza Aretoan, Zugan ni antzerki proposamena eskeiniko da, nerabeentzat kasu honetan. Bihar, zapatuz, goiz zein arratsaldez izango dira ikuskizunak. Tartean, esan behar, instalazino handia jarriko dala Zelaieta Parkean. Itinerania Titeretú izeneko instalazinoa. Esku erraldoi bat dala esan deusku Koldo Bilbaok. Adrian Conde, Txalapart konpainia, Zirkozaurre, Bea Larrañaga, Engruna Teatre, Zirkun Zirko edo Anita Marabillas konpainien lanak, doan ikusi ahal izango dira Amoreszena jaialdian gaurtik domekara bitartean. Herriko plazan, Zelaieta Zentroan, Zubiaur musika eskolan, Andra Mari plazan eta Zornotza Aretoan izango dira emonaldiak.

Musika proiektu batentzat izango da aurten

Thu, 21 May 2026 11:29:51 +0000

Abian da Sormen Beka DA! Ekimenaren bederatzigarren deialdia. Gerediaga alkarteak eta Durangoko Udalak emoten daben bekea da honakoa. 2018. urtean hasi ziran eta orain arte, ibilbide polita eta emonkorra izan dauala azpimarratu dabe antolatzaileek. Urtean, gitxi gorabehera, hamabi bat proiektu jasotzen dabez. Gerediaga alkartetik Gotzon Gomez lehendakariak esan deusku, sortzaile barriei laguntzea dala asmoa.

Irailerarteko epea

Aurten, musika proiektu bateri eskeiniko jako bekea. Irailaren 21era bitarteko epea dago proposamenak aurkezteko. Honeek jatorrizkoak izan behar dira, euskeraz sortutakoak. Banaka eta taldeka aurkeztu daitekez. Gerediagaren web orrira bialdu behar dira proposamenak eta oinarri guztiak Durangoko Azokaren web orrian dagoz. 15.000 euroko laguntzea emoten da beka honen bitartez. Ostean, urtebeteko epea dago proiektua garatzeko. Datorren urteko Durangoko Azokan aurkeztuko da behin amaituta, hau da, 2027. urteko azokan. Igaz, Gizaberetxoak. Joxe Azurmendiren joanak eta etorriak komikiarentzat izan zan laguntzea. Usue Egia, Ainhoa Olaso eta Mikel Urdangarinen proposamena hain zuzen. Honakoa abenduan aurkeztuko da, Durangoko Azokan.

40 konpainia inguruk egin dabe bat

Wed, 20 May 2026 11:45:06 +0000

Kale ikuskizunetan euskerearen presentzia areagotzeko manifestua bultzatu daben sortzaileek, indarrak batzeko asmoa iragarri dabe. Artekalek, Euskal Herriko Kale Arteen alkarteak, Leioako Umore Azokan aurkeztu eban aurreko astean Euskara, jalgi handi plazara! manifestua. Kaleko ikuskizunen urteko hitzordurik garrantzitsuena da Leioa eta hainbat konpainia batu zan bertan. 40 inguruk babestu dabe manifestua. Honakoa lehenengo pausua dala esan deusku Artekaletik Mikel Ayllonek. Aurrera begira, indarrak batzen jarraituko dabela adierazi dau. Honakoa lehenengo pausua izan da. Artekalek orain urte bi agindu eban euskeraren egoeraren ganeko azterketea egitea. Datuek berretsi egin dabe euskeraz gitxiago sortzen dala.

Hiru ardatz

Leioako Umore Azokan aurkeztu dan manifestuak hiru ardatz daukaz. Alde batetik, gonbitea egiten deutse Euskal Herriko konpainiei euskeraz sortzeko. Bestalde, erakundeei be egiten deutsie dei, euskerazko ikuskizunak babesteko. Azkenik, publikoaren babesa aipatzen dabe. Euskal ekoizpenak ikustera joateko deia egiten dabe. Leioako Umore Azokea amaituta, Mikel Ayllonek esan deusku, eguraldiak asko baldintzatu dauala aurtengo edizinoa. Hori bai, aurten be, ikuskizun barriak aurkezteko erakusleiho handia izan da Leioa. 30 lan barri inguru erakutsi dira.

Zazpigarren edizinoa da aurtengoa

Tue, 19 May 2026 11:21:21 +0000

Kanariar Irletan eta Euskal Herrian egingo da aurten Urmugaren Urtanta, musikea eta mendia buztartzen dauazan ekimena. Maiatzaren 24tik bagilaren 1era bitartean egingo da Urtanta Kanariar Irletan eta garagarrilaren 17tik 25era Euskal Herrian. Aurtengoa, zazpigarren edizinoa da. Kanariar Irletan esan behar, antzeko ekimena antolatzen dabela, Contramapas izenekoa. Miguel Zeberiok azaldu deuskunez eurak izan ziran Urmugako kideakaz harremanetan jarri zirenak. Alkarlan aberasgarria izan dala esan deusku. Aurtengo Urtanta ekimenean, herrialde bietan gertatzen dan gai bat izango da ardatz; bizitza galtzen daben migranteen memoria.

Egitaraua

Kanariar Irletan, La Palma uhartea zeharkatuko dau espedizinoak eta Hierron amaituko da. Benabas talde senegaldarra, Arife taldea, Rogelio Botanz, Percuteras de Garaldea eta Et Incarnatus Orkestra arituko dira bertan besteak beste. Euskal musikea be eskeiniko da. Euskal Herrian Bidasoa inguruan hasiko dira garagarrilean. Ibardingo Lepoa eta Manttale artean joango da lehenengo eguna, Urruña eta Bera artean. Bigarrena izango da berezia, Bidasoa ibaiaren jeitsierea egin ahal izango dalako Santiagotarrak Arraun Alkarteak antolatuta. Amets Arzallus izango da bertan gidari. Lesaka eta Oiartzun artean joango da hurrengo eguna, Janus Lesterren emonaldiagaz besteak beste. Araban eta Bizkaian zehar jarraituko dau ibilbideak. Artomaña eta Delikan lehenengo Jaurlaritzaren 90. Urteurrena gogoratzeko musika emonaldi berezia izango da. Bizkaian, bitartean, Urduña aukeratu dabe garagarrilaren 25erako. Antiguako Santutegiko lorategian eskeiniko da kontzertua. Kepa Junkera izango da ohorezko gonbidadua bertan. Erromerien historia eskeiniko da erromeria baten bitartez. Uxue Kerejeta, Gorka Hermosa eta herriko dantzari eta musikariak arituko dira Et Incarnatus Orkestreagaz batera. Zuberoa eta Nafarroa arteko ibilbidea egiteko asmoa daukiela be esan deusku Migel Zeberiok baina oraindino ez dabe honakoa argitaratu web orrian. Kontzertuetarako sarrerak bagilaren hasieran jarriko dabez salgai bertan. Zeharkaldian zehar, natur guneekiko oreka eta jasangarritasun erizpideak zaintzeko deia egin dabe aurten be. Mendi Solidarioak taldearen eskutik bestalde, irisgarritasun mugatua daukien pertsonen partaidetzea bermatuko da.

Galdakaoko ikasleen sormena, talentua eta euskarazko kultura ardatz dituan jaialdia bueltan da

Mon, 18 May 2026 11:49:58 +0000

Sormene jaialdiak gazteen sormena eta euskal kultura batuko ditu barriro Galdakaon. Maiatzaren 19tik 23ra bitartean egingo da aurten seigarren edizinoa, Torrezabal Kultur Etxean. Galdakaoko ikasleen sormena, talentua eta euskarazko kultura ardatz dituan egitasmoak 'Hezurrak eta koadernoak' izango dau lelo, eta iraganaren eta etorkizunaren arteko loturea landuko dau literatura, musika, antzerkia eta bertsolaritzea buztartuz. Ane Legarreta antolatzaileak Lau Haizetara irratsaioan azaldu dauenez, aurten be ikastetxeetako gazteek izango dira protagonista nagusiak. Jaialdiaren berezitasunen inguruan galdetuta, Legarretak nabarmendu dau aurtengo edizinoak heldutasun puntu handiagoa erakusten dauela: “Igarri egiten da 6. edizinoa dala; ekintza guztiak hobeto josita dagoz, ikasleek Sormene ekimena maite dabe eta eurena egiten dabe”. Antolatzailearen berbetan, urteek emondako esperientziak, programa sendotzea eta parte-hartzaileek jaialdia euren moduan bizitzea ekarri dau.

Euskeraren garrantzia

Bestalde, euskararen garrantzia azpimarratu dau Legarretak, jaialdiaren ardatz nagusietako bat dala gogoratuz. “Euskerea garrantzitsua da bai sormen prozesuan bai elkarbanatzeko momentuan. Lan guztia euskeraz egindakoa da, eta euskal sortzaileak ezagutzera emotea garrantzitsua da, ikasleek euren barri izatea”, adierazo dau. Haren esanetan, Sormenek gazteei euskeraz sortzeko eta kulturagaz lotura estuagoa izateko aukerea emoten deutse.

Euskal Herriko sorginkeriaren historia eta Durangoko hereseak nabarmentzen dira

Wed, 13 May 2026 11:40:52 +0000

Euskal Herriko sorginkeriaren historia eta Durangoko hereseak nabarmentzen dira Ander Berrojalbizen liburu barrian. Mapas del tesoro. Brujas, herejes y otras musas izena jarri deutso durangarrak bere lan barriari. Ander Berrojalbiz irakaslea da Durangoko Bartolome Ertzilla kontserbatorioan. Musikaria be bada, biolina joten dau Kanthoria taldean eta ikertzailea be bai. Honakoa ez da sorginetaz edo herejeetaz idatzi dauan lehenengo lana. Ikertzen denbora asko emoten dau. Idazten baino ikertzen gehiago gozatzen dauala esan deusku. Azkenengo liburua argitaratu ebanean, aurkikuntza batzuk egin ebazala kontau deusku eta honeen barri emotea erabagi ebala. Era horretara etorri da aipatutako lana. El Gallo de Oro argitaletxeak kaleratutako liburua artikulu laburrez osotutakoa da. Euren artean logika bat dagoala esan deusku egileak.

Aurkikuntzak

Ander Berrojalbizek aurkitutako datuen artean aipatu daiteke 1507. urteko sorgin-erretze ospetsua Oñatin gertatu zala. Herri honetako agintariak izan ziran egileak. Leitekeena da, hau, Espainiako Inkisizinoaren lehen sorgin-ehiza handiena izatea. 30 emakume baino gehiago hil ebezala aipatzen da. Durangoko XV. mendeko hereseen ganean egindako aurkikuntzak be aipatzen dira artikuluetan. 1430eko hamarkadaren amaieran Durangon eta inguruetan heresia hedatu eben frantziskotarren aurretiazko ibileren barri emoten dau adibidez. Bestalde, Nafarroan sorgin-ehizaren dokumentuen ganeko isiltasunaren erabilera ideologikoari egiten deutson kritikea be nabarmentzen da. Durangon, atzo aurkeztu eban hirugarrenez bere lana Ander Berrojalbizek. Oñatin eta Iruñean be izan da eta asmoa bagilean, Aragoin aurkeztea da.

38 artelanen erreprodukzinoak ikusgai 30 herritan abendura bitartean

Mon, 11 May 2026 11:31:33 +0000

Bilboko Arte Ederren museoak Artearen Ibilbidea erakusketa ibiltariaren zazpigarren edizinoa aurkeztu dau. Arte Ederren museoak bere bildumako artelanak ataraten dauz kalera BBK Artearen Ibilbidea erakusketaren bitartez. Bizkaian zehar, astez aste eskaintzen dan erakusketa honetan artelanen maila handiko erreprodukzinoak dagoz ikusgai. Cesar Ochoak, museoko hezkuntza eta kultur saileko kideak esan deusku, artea herritarrengana hurreratzea dala helburua.

'Animalitegia'

Gai baten inguruko artelanak eskaintzen dira erakusketa ibiltari honetan. Animalitegia da aurten aukeratu dan gaia. Animaliak dira protagonista artelan guztietan. Margolanak, grabatuak, kartelak edo arte aplikatuak dagoz tartean. Bildumako maisulanak, ABC Bilboko Museoaren alfabetoa, Emakumeak museoan, Bizkaiari begira, Haurrak artean eta Istorioak izan dira orain arteko gaiak Artearen Ibilbidea erakusketan. Jose Luis Merino Gorospek egin dau komisario-lana. Museoko Antxinako Artearen kontserbatzailea da bera. 38 artelanen erreprodukzinoak sartzen dira aurtengo erakusketan. Izen handiak dagoz tartean, eta euskal artistak be bai: Ignacio Zuluaga, Aurelio Arteta, Alberto Schommer... 15 euskal artisten lanak eta bost emakumeen lanetatik bi, euskal emakume artistenak dira. Bilbon aurkeztu da BBK Artearen Ibilbidea erakusketa ibiltariaren zazpigarren edizinoa. Bilboko Kale Nagusian egongo dira lanak ikusgai maiatzaren 18ra bitartean. Ostean Barakaldon ikusi ahal izango dira. Abendura bitartean, Bizkaiko 30 herritik igaroko da erakusketea. Durangon amaituko da.

Gazte Konpainiako aktoreak protagonista

Fri, 08 May 2026 11:24:14 +0000

La Noche antzezlanaren estreinaldia izango da gaur Bilboko Pabellon 6 aretoan. Antzerki Laborategiaren azken ekoizpen propioa da honakoa. Juana Lor eta Emilio Encaboren artean sortu da. Aspaldiko lagunak dira biak eta euren lankidetza artistikoa orain 20 urte hasi zan Gaitzerdi konpainian. Juanak lehenengoz zuzentzen dau Emilioren testu dramaturgiko bat. La Noche, izen hori daukan taberna baten, gau baten gertatzen da. Tabernaren kanpoaldean zein barrualdean gertatzen diranak kontetan dira. Kamara bat be erabiltzen da eta horrek antzezlan hau, berezi egiten dauala esan deusku Alazne Astorga aktoreak. Ez da antzezlan tradizional bat bere esanetan.

Istorioa

Alaznegaz batera, Pabellon 6ko Gazte Konpainiaren lanetan parte hartu daben Sara Barroeta, Ioritz Benito, Leire Ormazabal, Sandra Ortueta eta Sofia Zallio aktoreak agertzen dira antzezlanean. Bakotxak 2 edo 3 pertsonai daukaz. Astorga, esate baterako, tabernaren ugazaba, DJ-a eta bakarrik geratzen dan neska bat da. Tabernara era batera sartuko dira pertsonaiak, eta beste era batera urtengo dabe bertatik. Aipatu behar, Dantzerti eskolan praktiketan dagozan 10 ikaslek be hartzen dabela parte La Noche antzezlanean. Dantzalekuan jente gehiago egon behar zala ikusita, gonbitea egin eutsen eta gustora ari dira eurekaz. Betitxe Saitua eta Quique Gago arduratu dira eszenografiaz eta Saitua jantzietaz. La Noche Pabellon 6 aretoan eskeiniko da gaurtik maiatzaren 31ra bitartean, bariku-zapatu-domekatan. Hurreratzen diranei gonbitea egin deutsie ausartak izan eta jantzi aproposakaz joateko antzokira. La Noche izeneko disko-tabernan jente guztia ederra dala dinoe.

Euskadik espazio propioa lortu gura Bienalean

Thu, 07 May 2026 11:47:39 +0000

I Baschi alla Biennale 1976-2026 egitasmoagaz bueltatu da Euskadi aurten Veneziako Biurtekora. Orain 50 urte espainiar estaduari eskeini jakon tartea, baina euskal artistek uko egin eutsien bertan parte hartzeari. Horren ordez, euren kabuz joan ziran autobusez eta programa ofizialean aritu ez arren, euskal artistek euren lana erakusteko erea izan eben. Ordukoa gogoratuz, Eusko Jaurlaritzak, Etxepare Euskal Institutuak, Euskal Herriko Arte Garaikidearen Museoak, Artium Museoak eta Veneziako Ca’ Foscari unibertsidadeak, diziplina anitzeko programea sortu dabe Venezian erakusteko. Irene Larraza Etxepare Euskal Institutuko zuzendariak esan deuskunez memoria eta praktika artistikoa buztartzen dira programa honetan. I Baschi alla Biennale 1976-2026-gaz orduko ikuspegia mantentzen da, baina tresna eta lengoi barrituagaz.

Inaugurazino ekitaldia

Ibone Bengoetxea lehendakari ordea izan da gaur Biurtekoaren inaugurazino ekitaldi ofizialean. Azaldu dauanez, Jaurlaritzaren helburua 2028tik aurrera Euskadik Veneziako Bienalean espazio propioa izatea lortzea da. Bengoetxeak aldarrikatu dau kulturea, askatasunerako, identidaderako eta demokraziaren defentsarako tresna dala. 1976. urteko Bienaleko protagonisten senideak eta gaur eguneko euskal artistak izan dira ekitaldian. Itziar Okariz artistea, Tripak Kolektiboa, Joseba Zulaika, Beñat Sarasola edo Alessandro Mistrorigo idazle eta ikerlariak dagoz, besteak beste, Venezian. Atzo hasi zan euskal ordezkaritzaren programea eta bihar artekoa da. Larrazak esan deuskunez, jakin-mina eragin dau Euskaditik eskaintzen dan programeak.

Urrian egingo da 11. Baffest jaialdia

Wed, 06 May 2026 11:29:27 +0000

Abian da Baffest jaialdiaren hamaikagarren edizinoko argazki lehiaketea. Emakume argazkilarien jaialdia da Baffest. Urrian egingo da hamaikagarrenez Barakaldon eta lehiaketara lanak aurkeztu daitekez maiatzaren 24ra bitartean. Esan behar, igaz 250 lan baino gehiago aurkeztu zirala, inoiz baino gehiago. Gogoratu behar da lehiaketa hau, Baffest jaialdiaren ardatz nagusia dala. Onintze Garcia komunikazino arduradunak gogoratu dauanez, emakume argazkilarien lana ikusaraztea da helburu nagusia. Aurten be kategoria bi dagoz lehiaketan, Euskal Herrikoa eta Estadukoa. 18 urtetik gorako emakume argazkilariek hartu leikie parte. Gaia librea da eta gehienez 10 irudi aurkeztu daitekez. Informazino guztia eta izena emoteko baldintzak web orrian dagoz. Carmen Dalmau, Maria Azkarate eta Rocio Bueno dira epaimahaia osotzen dabenak. Honeek 9 finalista aukeratuko dabez eta argazkilariek, Baffest jaialdiaren egun handian, Argazki egunean, urrian, euren hautagaitza defendatuko dabe publikoaren aurrean.

Erakusketea eta kartela

Aurtengo jaialdian ikusi ahal izango dan erakusketa baten barri be emon dabe. Osakidetzagaz alkarlanean eskeiniko da. Ainhoa Perez Olaeta da egilea eta ostomizatutako pazienteen irudi bilduma agertzen da bertan. Galdakaoko Ospitaleko ESItik datorren ekimena da, bertan dago orain ikusgai. Erakusketa hau, Musika Konserbatorioan egongo da ikusgai urrian. Baffest jaialdiak, bestalde, Sara Prieto diseinatzaile grafiko barakaldarrak egindako irudia aurkeztu dau. Eulalia Abaituaren argazki historiko baten oinarritutako ilustrazinoa da nagusi bertan. Prietok gaur egunera ekarri dau orduko irudia. Baffest jaialdiari esker, Barakaldoko kaleak, museo bihurtuko dira beste behin datorren urrian.

Anita Maravillas konpainiaren 'Andereño' antzezlanak hiru izendapen lortu ditu aurtengo Max sarietan

Mon, 04 May 2026 11:45:49 +0000

Miren Larrea Zornotzako antzerkigile eta txotxongilo-sortzailea da, eta Anita Maravillas konpainiaren ardatzetako bat. Hogei urteko ibilbidean, konpainiak erreferente bihurtu dau txotxongilo-antzerkia euskal eszenan, sormen propioa, poesia bisuala eta gai sozialak buztartuz. Orain, Andereño lanagaz heldu jake aitortzarik handienetako bat: Max sarietarako hiru izendapen lortu ditu, euskal ikuskizunen artean nabarmenduz. Larreak azaldu dauenez, une hau “gogotsu eta ilusinoz” bizi dabe, eta ekainaren 1eko gala begi onez eta emozinoz itxaroten dabe. Andereño lanak memoria historikoa, gerrea eta hezkuntza gurutzatzen ditu umeen begiradatik. Obraren abiapuntua Bizkaiko portuetatik ihes egin eben umeen irudi gogor eta inpaktanteetan dagoela kontau dau Larreak: “Irudi inpaktanteak iruditu jakuzan Bizkaiko portuetatik ihes egin eben umeena, eta horren harira egin genduan”. Familia publikoari begira sortutako antzezlana izan arren, helduak be erakartzen ditu, eta publiko mota biek modu desbardinean baina sakon bizi dabe kontakizuna. Umeen presentziara egokitzeko, gainera, berba batzuk moldatu egiten ditue, mezua edade guztietara modu egokian heltzeko. Anita Maravillasen berezitasunetako bat txotxongiloen bidezko kontakizun indartsua da. Larrearen esanetan, “titereak iruditegi propioa emoten dabe”, aktoreak eszenan egon arren, objektuak eta panpinak bihurtzen dira kontakizunaren benetako protagonistak. Horrek ikuslearen irudimena beste leku batera eroaten dau, antzerki molde tradizionalek lortzen ez daben moduan. Hamarkada biko ibilbidean, ganera, beste diziplina batzuetako sortzaileakaz lan egitea giltzarri izan dala azpimarratu dau, sormen proiektua bizirik, aberats eta etengabeko bilakaeran mantentzeko. Maiatza amaieran alde batera itxiko dabe 2023tik Estadu osotik eroan daben Andereño lana, eta abentura barri bati ekingo deutsie konpainiatik. Aurrerapen handirik egin barik, bizkaitar 'bandolero' baten istorioa ardatz izango dauan antzezlana urrian estreinauko dabela azaldu deusku Larreak.

Txapelketaren 30 urteko ibilbidea eta material didaktikoa batzen dira lan honetan

Thu, 30 Apr 2026 11:12:34 +0000

Sopelako Esaera Zaharren Txapelketaren ganeko 30 urteko historia batu da liburu baten. Aurreko astean egin zan Sopelan, 31. Esaera Zaharren Txapelketea. Bertan aurkeztu zan Aitor Fernandez de Martikorenak egin dauan liburua. AEKko irakaslea da bera eta AEK da Sopelan egiten dan txapelketa honen antolatzailea. 90ko hamarkadan hasi ziran antolatzen irakasle biren ekimenez. Taldeka egiten da goizean hasi eta arratsaldera bitartean. Bertsoak entzun eta eurei lotutako esaera zaharrak identifikatu behar dabez parte-hartzaileek. Zenbat eta gehiago identifikatu puntu gehiago lortuko dabez. 30 taldek hartu eben parte aurreko astegoienean eta giro onean egin zan azken txapelketea. Sopeloztarrentzat be urteko hitzordu garrantzitsuenetarikoa bihurtu da honakoa. Bertsolariak eta musikariak be izaten dira tartean. Aissa Intxausti eta Aner Peritz bertsolariak izan ziran aurrekoan. Txapelaz gain, landetxe baten astegoiena igarotzeko lagun birentzako txartela izaten da saria.

Liburua

Txapelketaren egunaren bezperan aurkeztu zan Sopelan, Fernandez de Martikorenaren lana. Kurtzio kultur etxean batu ziranak ganera, lehiaketa txiki baten hartu eben parte. Liburua bera izan zan saria. AEKk emon eutson txapelketaren ganekoak idaztearen ideia Fernandez de Martikorenari. Liburuan, batetik, parte hartu dabenei begira txapelketaren historiaren barri emoten dau, argazki ugari sartuta eta bestetik, material didaktikoa eskaintzen dau. Sopelako Esaera Zaharren Txapelketa: edo nola (ez) antolatu herri ekintzak liburua euskaltegietan eskuratu ahal izango da laster. Aurretik egileak berak dauka lana banatzeko ardurea.

Balio historiko handia daukien agiriak dagoz ikusgai

Wed, 29 Apr 2026 11:48:12 +0000

Bizkaiko Foru barriaren onarpenaren 500. urteurrenaren ganeko erakusketa bi dagoz ikusgai Bilbon. Bizkaiko Foru Aldundiak eta Bizkaiko Batzar Nagusiek antolatutako erakusketak dira. Foru Liburutegian dago euretariko bat, eta bigarrena Kale Nagusian. Azken hau, ibiltaria da eta hainbat udalerri zeharkatuko dauz. Balio historiko handia daukien agiriak dagoz ikusgai Foru Liburutegiko erakusketan. Tartean, Bizkaiko Foru Barriaren jatorrizko liburua dago. Rosa Ayerbe eta Imanol Merino dira erakusketaren komisarioak. Merinok aipatu deuskunez, testua hainbeste urtez indarrean egotea ospatu behar zan.

Harribitxiak ikusgai

Foru Barriaren historia 1526. urtean hasten da, onartzen dan urtean. Erakusketan, bost bitrinatan, foruaren edizinoen bilduma oso bat dago. Ideia bi azpimarratu dauz Imanol Merino komisarioak: foru barria badago, zaharra be egongo zala eta ordukoa ulertzeak datorrena ulertzeko balio leikela. Forua XX. mendera arte gaztelaniaz argitaratu zan eta 1981. urtekoa da euskerazko lehen bertsinoa, bizkaieraz idatzitakoa. Erakusketa ‘akademikoagoa’ da Foru Liburutegian dagoana eta ‘dibulgatzaileagoa’ Bilboko Kale Nagusian dagoana. Formatu handiko hamar panel informatibo dagoz bertan. Jakin-mina eragiten dabe honeek eta gogoa piztu leikie foru liburutegian dagoana ikusteko. Kaleko erakusketa hau maiatzaren 11ra bitartean egongo da ikusgai Bilbon. Ostean, Balmaseda, Bermeo, Portugalete eta Galdakaora eroango dabe. Bestalde, Bilboko metroko geltoki batzuetan be, erakusketen bertsino txikiago bat eskeiniko da abuztura bitartean.

Iruñean, Bergaran, Lesakan eta Baionan be izango dira, BECen azkenengo kontzertu biak eskeini aurretik

Tue, 28 Apr 2026 11:33:48 +0000

Pantxoa eta Peiok oroitzapen berezia mantentzen dabe Bilboko Santutxu auzoan 1976. urtean eskeinitako kontzertuaz. Maiatzaren 9an bueltatuko dira Pantxoa Karrere eta Peio Ospital Santutxura. 2027ko urtarrilean BECen eskeiniko dabezan azken kontzertu handi bien aurretik eskeiniko daben Azken Biraren barruan sartzen da Santutxuko emonaldia. Bizkaia Irratian izan dira gaur musikari biak. Eskeiniko dabezan azkenengo kontzertuak direla eta, gaztetuta, pozik eta urduri dagozala esan deuskue. Gogoratu behar, urtarrilaren 10erako ez dala sarrerarik geratzen eta urtarrilaren 9an joan ahal izateko gitxi batzuk geratzen direla. Peio Ospitalen esanetan, euren ibilbideak holango amaiera duin bat behar eban.

Santutxuko emonaldia

Pantxoa eta Peiorentzat esangura berezia izan eben kontzertuak izango dira datorren astean hasita eskeiniko dabezanak. Santutxun, 1976. urtean izan zan bikotea. Ikurriña bat agertu zalako Espainiako poliziak bertan behera itxi eban kontzertua. Jose Ramon Etxebarriak, Santutxuko orduko antolatzaileetario batek gogoratu deusku, zazpi mila lagun batu zirela. Gazteek bultzatutako ekimena izan zan eta gaur egunekoa be gazteek antolatu dabe, Dabi Piedra tartean. Iparraldeko bikoteak be oroitzapen berezia dauka Santutxuko kontzertuaz. Datorren asterako, ez da sarrerarik geratzen. Pantxoa eta Peiok Bergaran eskeini eben Hegoaldeko lehenengo kontzertua. 200 lagunen aurrean kantatzera ohituta egozan eta 2.000 lagun batu ziran kontzertu hartan. Irailaren 16an izango dira barriro bertan. Iruñean izango dira aurretik, maiatzaren 24an. Lesakara, irailaren 5ean bueltatuko dira. Kasu honetan, goardia zibilak atxilotu ebezan eta kuartelean igaro eben gaua. Azkenik, Baionan eskeiniko dabe kontzertua abenduaren 11n. Ostean etorriko dira azkenengo emonaldi biak BECen. Ohikoa dan lez, Ipar eta Hego Euskal Herriko musikariak izango dabez ondoan. Dánae Riaño euskal aktore eta abeslaria izango da euretariko bat, baxujolea. 55 urteko aldea dago euren artean. Josu Erviti perkusinoan, Iñaki Dieguez eskusoinuagaz, Mixel Ducau gitarran eta Gorka Pastor teklatuetan dira gainontzekoak. Errepertorioari jagokonez, kantuen aukeraketa bat egin dabela esan deuskue. Pantxoa eta Peiok urtarrilaren 9an eskeiniko daben kontzerturako sarrerak pantxoaetapeio.eus webgunean eskuratu daitekez.

'Euskerazko musikagintzaren genealogia barri bat' gaia aukeratu dabe

Mon, 27 Apr 2026 11:49:40 +0000

Bihar zabalduko da Kanterri egitasmoaren barruko ikastaroetan izena emoteko epea. Kanterri, 'euskeraz kantetan dauan herria' da egitasmoa eta Oiartzunen garagarrilaren 2an eta 3an egingo dira aurten ikastaroak bosgarrenez. Oiartzungo Kantagiltza alkartea, Udala, Ahotsenea eta Soinuenea alkarteak dira antolatzaileak. Azken alkarte honeetatik, Gotzon Barandiaranek esan deusku gaur, kantagintzaren ganeko alkarrizketa soziala bultzatzea dala ikastaroen helburua, musikagintzea ertz guztietatik azaldu gura da.

Berbaldiak, mahai-ingurua, kantaldia...

Euskerazko musikagintzaren geneaologia barri bat gaia aukeratu da urte honetako ikastaroetarako. Euskal kantagintzaren historia beste ikuspegi batetik berridatzi beharraz hausnartuko da aurten. Berbaldiak, mahai-inguru bat eta kantaldi bat izango dira Oiartzunen garagarrilaren 2an eta 3an. Iratxe Retolazak euskal kantagintzaren genealogia feministak aztertuko dauz, Iraia Cambrak emakumeak euskal musika ezenan izandako lekua, Jone Expositok euskal musikagintaren hausnarketa feministea egingo dau, eta Udane Barinaga-Rementeriak aktibismo feminista aztertuko dau Euskal Herriko musika kontrakulturaletan. Hizlarion saioak osogarriak dira. Mahai-inguruan, bestalde, aurtengo pastorala idatzi dauan Leire Casamajou, Estitxuren ganeko lana egin dauan Franck Dolosor eta Maixa Lizarribar trikitilaria izango dira. Kantaldian, barriz, Estitxu, Lurdes Iriondo eta Maite Idirin izango dabez gogoan Maider Bedaxagarrek, Maialen Alfarok eta Naia Roblesek. Bihartik maiatzaren 28ra bitartean emon daiteke izena ikastaroetan, Kanterriren web orrian. Egun bakarrerako eta bietarako emon daiteke izena. Oiartzungo Udalbatza aretoan izango dira saio guztiak.

Gerediaga alkarteak koordinatzen dau

Fri, 24 Apr 2026 11:23:21 +0000

Durangaldeko Ezpatadantzari Eguna Amorebieta-Etxanon ospatuko da bihar. Durangaldeko Ezpatadantzari eguna 1967. urtean egin zan lehenengoz Iurretan. Urte batzuetako etenaren ostean, 2023. urtean hasi ziran barriro antolatzen. Gerediaga alkartea da egun honen koordinatzailea. Bertatik, Goiatz Pelaezek esan deusku, dantza taldeak eurak bultzatuta hasi zirala barriro egun hau ospatzen. Durangaldea 14 herrik osotzen dabe. Batzuetan dantza talde bi be badagoz. Gehienen artean harremana dago. Ezpatadantzari eguna ospatuta, sustapen lan aktiboa egin gura dabe eta transmisinoa landu.

Jai-giroa nagusi

Amorebieta-Etxanon egingo da bihar lehenengoz Durangaldeko Ezpatadantzari eguna. Bertako Udabarri dantza taldeak 60 urte bete dauz aurten. Badabilz urtean zehar ekitaldiak antolatzen urteurrena ospatzeko. Biharkoa, eurentzat, berezia izango da. Bihar, arratsaldeko 17:30ean batuko dira dantza talde guztiak Zelaieta zentroan. Amorebieta-Etxanoko Udabarri, Berrizko Iremiñe eta San Lorentzo, Durangoko Kriskitin eta Txoritxu Alai, Garaiko dantza taldea, Iurretako dantzariak, Mallabiako Gazte Alai, Mañariko Andra Mari dantza taldea eta Otxandioko Urduri dantza taldeak arituko dira. Agintariarena, makil-dantza edo banangoa moduko dantzak eskeiniko dabez seiretatik aurrera herriko plazan. Dantzari-dantza be eskeiniko dabe, Durangaldean bertan jaiotakoa. Amorebieta-Etxanoko Udazken, Jaizale, Durangaldeko txistularien alkartea eta Ontxandiotik Kaleik-Kale txistulari taldeak izango dira dantzariakaz batera. Dantza emonaldiaren ostean, jai-giroak jarraituko dau Amorebieta-Etxanon, Kittu taldeagaz.

'Hamaika irakurtzeko jaioak' liburuaren parte da ipuina

Thu, 23 Apr 2026 11:29:45 +0000

Harrera oso ona izan dau Goitibera antzerki taldeko kideek Geuretik Sortuak ekimenean idatzi daben Erraietako Tximeleta ipuinak. Saioa Iribarren eta Ander Basaldua dira Erraietako Tximeleta ipuinaren sortzaileak. Geuretik Sortuak, Udalbiltzaren programaren Hamaika Irakurtzeko Jaioak liburuan agertzen dan ipuinetariko bat da. Honakoa idazteko hiru asteko egonaldia egin eben Oiartzungo Karrika auzoan. Orain arte be memoria landu dabe euren antzerki lanetan eta esan deuskuenez, memoriaz idatziko ebela argi euken baina hutsean joan ziran Oiartzunera.

Idazteko prozesua

Oiartzungo hainbat lagunegaz izan ziran, talde askoren ekarpenak eta dokumentazinoa bildu, istorioa zehaztu eta egonaldiaren hirugarren astean hasi ziran ipuina idazten. Prozesuan zehar, Dijitalidadea argitaletxeko Gotzon Barandiaranen laguntzea izan dabe. Oparitzat hartu dabe honakoa. Erraietako Tximeleta maitasun istorio bat da eta frankismo garaiko esklaboak dira protagonista. Bakotxak bere partea idatzi dau, Saioak lehen pertsonan eta orainaldian, eta Anderrek hirugarren pertsonan eta iraganean. Ipuinak oso harrera ona izan dauala esan deuskue egile biek. Asko saltzen ari da eta irakurle asko hunkitu direla azaldu dabe. Lana aurkezteko, irakurketa dramatizatuak eskaintzen dabez. Azaldu dabenez, antzerkigileak izanik, liburua era horretara aurkeztea erabagi eben. Sopelan gaur egin behar zan aurkezpena, baina bertan behera geratu da. Leitekeena da bagilaren 5ean eskaintzea.

Modu independientean argitaratu dau eta Bubok plataforman eskuratu daiteke

Tue, 21 Apr 2026 11:27:35 +0000

Jon Ander Fidalgo ezagutu dogu gaur Bizkaia Irratian. Hainbat izeneko bere lehen liburua aurkeztu deusku. Urretxuarra da izatez, baina Bilbon bizi da aspaldion. Komertziala da bera ogibidez. 31 urte daukaz eta orain dala urte bi hasi zan idazten. Liburua kaleratzeko ideia, aspaldikoa dala esan deusku eta argi eukala hasieratik idatzitakoa argitaratuko ebala. 6 ipuinek osotzen dabe bere lehen liburua. Euren artean ez dago loturarik eta gaiak be desbardinak dira bata eta besteen artean.

Autoekoiztutako lana

Hamaika izena jarri gura izan eutson hasieran lanari eta hamaika ipuin idatzi. Kontua da, azkenean ohartu zala ez zirala 11 izango. Idazteko prozesuari jagokonez, ez dau ipuin bat hasi eta amaitu jarraian, denbora bat joan da bakotxa amaitu arte. Azkenengo ipuina da luzeena, 45 orrialdekoa. Laburrenak, barriz, 3 orrialde daukaz. Jon Ander Fidalgok modu independientean argitaratu dau bere lehen liburua. Bubok izeneko plataforman eskuratu daiteke. Diseinua, adimen artifizialaren laguntzeagaz egin dauala azaldu deusku egileak. Momentuz, Hainbat idatzi dau eta honakoak daukan erantzuna zein dan ikusi gura dauala esan deusku.

Euskal Herriko 5 ikastetxetako 82 gaztek hartzen dabe parte

Mon, 20 Apr 2026 11:41:32 +0000

Barikuan eskeiniko da Ezer ez delako amaitzen ikuskizuna Barakaldon. Memoria historikoa lantzen dauan ikuskizuna da. Intxorta 1937 kultur alkartea eta Loraldia dira ikuskizuna bultzatu dabenak, Euskal Herriko bost ikastetxegaz batera. Egitasmo zabala antolatu dabe. Memoria historikoa, transmisinoa, kultur-sorkuntzea eta omenaldia buztartzen dauz. Igor Martin de Vidales da ikuskizunaren gidoiaren egilea eta zuzendari artistikoa. Azaldu deuskunez, gazteen artean gero eta zabalduago dagoen gorroto diskurtsoa ikusita hartu eben egitasmoa abian jartzeko erabagia.

82 gazte

82 gazte dabilz ikuskizuna prestatzen. Iurretako Juan Orobiogoitia ikastetxea, Zumarraga-Urretxuko Iparragirre, Duranako Ikasbidea, Durangoko Fray Juan de Zumarraga eta Bilboko Ibarrekolanda ikastetxeetako ikasleak dira. Ikasturtean zehar memoria lantzen ibili dira. Lanketa didaktikoa izan da. Antzerkia, poesia, musikea eta dantzea buztartzen dira barikuan lehenengoz eskeiniko daben ikuskizunean. Joseba Sarrionaindiaren testuak be tartekatuko dira. Gidoiari jagokonez, collage egiturea izango dau, lehenaldiko pasarteak gaur eguneko gertakariakaz tartekatuko dira. Gazteak urduri eta gogotsu dagoz ikuskizuna eskaintzeko. Barakaldon izango da lehenengo emonaldia barikuan, iluntzeko zazpiretan, Clara Campoamor kultur etxean. Maiatzaren 1ean Durangon eskeiniko dabe, 8an Donostian, 15ean Gasteizen eta 22an Gernika-Lumon. Azken honetan, erbestea ezagutu eben haurrei eta euren familiei aitortzea egingo jake ikuskizuna eskeini aurretik.

Shakespeare-ren klasikoaren ganeko barrikuspen garaikidea eskaintzen dabe

Fri, 17 Apr 2026 11:55:39 +0000

La Dramatica Errante konpainia Bilboko BBK Salara bueltau da orain 6 hile bertan estreinautako R&J antzezlanagaz. Shakespeare-ren Romeo eta Julieta klasikoaren ganeko barrikuspen garaikidetzat hartu daiteke antzezlana. Maria Goiricelaya arduratu da egokitzapena egiteaz eta zuzentzeaz. Aktore lanetan, barriz, Ane Pikaza, Aitor Borobia, Nagore Gonzalez, Egoitz Sanchez eta Luix Mitxelena ari dira. Azken bi honeek esan deuskuenez, orain arte, harrera oso ona izan dau antzezlanak.

Istorioak tartekatuta

Maitasun istorio bat baino gehiago azaltzen dira lan honetan, maitasuna ikuspegi askotatik azaltzen da. Hiru bikote garaikide dira protagonista. Pertsonaiak etengabe aldatzen doaz. Ikuskizun korala dala azaldu deuskue aktore biek. Azpimarratzekoa da antzezlanaren eszenografia eta jantzi proposamen apurtzaileak. Azegiñe Urigoitia da jantzien arduraduna. Ustebako musika-hautaketak eta soinu-espazioak be nabarmendu behar dira. Ibon Belandiaren ardurea izan da musikea. Gaur eta bihar gaztelaniaz eskeiniko dabe Bilboko BBK Salan R&J antzezlana. Domekan euskeraz izango da. Aurrera begira, agendan, hitzordu bat baino gehiago daukie oraindino.

Galizia da aurten gonbidatua

Thu, 16 Apr 2026 11:25:06 +0000

Galizia izango da gonbidatua Txakomic jaialdiaren seigarren edizinoan. Bihar hasi eta domekara bitartekoa izango da, gastronomia, txakolina eta komikia buztartzen dauazan jaialdia Leioan eta Bakion. Mendibile Jauregian eta Txakolin Museoan egingo da aurten. Orain arteko edizinoetan, itzelezko arrakasta izan dau ekimen honek. Maider Zalduondok, Bizkaiko Txakolina Jatorri Izendapeneko kideak azaldu deuskunez, komikia da abiapuntua. Ilustrazino bat sortzen da batetik, eta bestetik, txakolinaz eta gastronomiaz gozatu.

Galiziako behi gazta

Galizia da aurten gonbidatua. Bihar, Galiziako gazta dastatzeko erea egongo da eta Mamen Moreu ilustratzailea zuzenean arituko da. Behi gaztak ekarri dabez Galiziatik. Zapatuan, Folk Terra Nai taldearen kontzertua eta Charlee Mitto ilustratzailea arituko dira Leioan. Aipatzekoa, nobedadea dala aurten Zurrut! izeneko azokea egingo dala lehenengoz Mendibile jauregian. 6 postu egongo dira honetan. Bertan, besteak beste, Iker Bildosola eta Sergio Ortiz de Zaratek, komiki formatua daukan lehenengo euskal sukaldaritza liburua aurkeztuko dabe, Saltsa Nostra izenekoa. Domekan, Bakioko Txakolin museoa izango da jaialdiaren gune nagusia. Showcooking eta dastaketez gain tailerrak be izango dira Txakomic jaialdian. Webgunean eskuratu daitekez sarrerak. Ekitaldi batzuetarako oso gitxi geratzen direla esan behar.

Urteurrena ospatzeko, maiatzaren 23an 'Zinemaren 80 urte' ikuskizuna eskainko dabe Social Antzokian

Wed, 15 Apr 2026 12:22:52 +0000

Aurten Basauri Koral Elkarteak 80. urteurrena ospatzen dau. 75 urte bete ebazanean, pandemia betean gengozan eta ezin izan eben merezi daun moduan ospatu. Aurten, baina, ospatuko dabe. Zinemaren 80 urte - 80 años de cine ikuskizuna prestetan dabilz, 51. Basauriko Ahots-Musika Topaketak (BAT) ekitaldiaren barruan eskaintzeko. 51. Basauriko Ahots-Musika Topaketak maiatzaren 9tik 23ra egingo dira. Aurtengo kontzertuak Asturiaseko Piloñesa Abesbatza, Basauriko Soinu Bidea, Zirzira Ahots taldea, Ugaoko Sarea Abesbatza eta Basauri Koral Elkartearen eskutik etorriko dira. Lau emonaldietatik hiru San Pedro elizan izango dira, eta Basauri Koral Elkartearena, barriz, Social Antzokian. Emonaldi guztiak doakoak izango dira. Igone Intxaurraga koraleko kideak azaldu deuskunez, honakoa urte berezia da taldearentzat, ez bakarrik iraganari begiratzeko, baizik eta etorkizuna sendotzeko be. "80 urteko ibilbideak erakusten dau herri honek musikarekiko daukan konpromisoa eta maitasuna", azaldu dau Intxaurragak. Bere esanetan, korala ez da bakarrik abesbatza bat; komunidade bat da, belaunaldi desbardinak batzen dauana.

Basauriko Koral Elkarteak 80 urte: iragana ospatu eta etorkizuna kantuan
80 urteko doinuak: Basauriko Koral Elkartearen urteurren berezia
“Komunitate bat gara”: Basauriko Koral Elkarteak 80 urte bete ditu
Urteurren berezia Basaurin: koralak 80 urte bete ditu musikaz lagunduta
Tokiko ahotsak protagonista: Basauriko Koralak 80 urte ospatzen ditu

Alkarte barriak musika eskubideen kudeaketa eredua barritzeko nahia agertu dau

Mon, 13 Apr 2026 13:41:44 +0000

Musika eskubideen egungo kudeaketa kolokan jarri eta Euskal Herriko musikari balioa emotea dauka helburu eratu barri dan Ereinez alkarteak. Iparraldeko artista, ostalari, festibal antolatzaile eta bestelako eragileak sortu dabe alkartea, tokiko sorkuntza babestu eta musika eskubideen kudeaketan eredu bidezkoago baten alde egiteko. Mattin Laaksonek Bizkaia Irratian azaldu dauanez, alkartea sortzeko arrazoi nagusietako bat, egile eskubideen egungo sitemarekiko kezka izan da. Bere esanetan, kudeaketa zentralizatuegia da, eta askotan ez dau gardentasunik izaten. Testuinguru horretan kokatzen da Urruñako Xaia ostatuak egile eskubideengatik jasotako isuna. Sacem Frantziako Musikagileen eta Editoreen Alkargoak 9.300 euroko isuna jarri eutsan ostatuari igazko udan, musika jartzeagaitik jagokon diru kopurua ez ordaintzeagaitik. Gertakari horrek piztu eban hainbat eragileren kezka, eta neurri baten, Ereinez sortzeko bultzada be izan zan. Halanda be, Laaksonek azpimarratu dau alkartea ez dala kasu konkretu bati erantzuteko sortu. "Xaia kasuak piztu gaitu, baina gure helburua zabalagoa da: tokiko artista guztien egoerea hobetzea", gaineratu dau Laaksonek. Alkartearen ustez, gaur egungo sistemak ez dauz behar bezala ezagutzen ez tokiko sortzaileak, ezta euskal kulturaren berezitasunak be. Horren aurrean, Ereinez alkarteak informazinoa bildu eta partekatzeko lana egin gura dau, bai artistakaz, bai antolatzaileakaz. Helburua da gardentasuna handitzea eta fakturen atzean dagoan logika argitzea. Ereinezek bitartekari lana egin gura dau etorkizunean, sektoreko eragileen eta egile eskubideen kudeatzaileen artean. Momentuz, hastapenetan dagoan egitasmoa da, baina dagoeneko hainbat eragileren babesa jaso dau. Artistak, taldeak, festibalak eta bestelako kultur eragileak batu dira proiektura.