Ainhoa Escobal Kaikuko arraunlariagaz egin dogu berba asteon Emakumeak Jokoan irratsaioaren emonaldi barrian. Escobal 2003an jaio zan Sestaon eta 11 urte eukazanetik dago bere herriko traineruan. Hasierako urteetan, lagunekaz batera egoan harrobiko mailetan. Halanda be, beste batzuk ez bezala, lehen taldera heltzeko gai izan da, Donostiarran be urtebete emon eta gero lagatuta. Bere eskutik, egindako ibilbidearen errepasoa burutu dogu.
2023an oso hurbil euki eban Kaikuk igoerea. Bizkaitarrak igoteko playoffean parte hartu eban, baina ez eban helburua lortu, gertu gelditu arren. Ondorioz, itxaropentsu ekin eutson Sestaoko traineruak 2024ko denporaldiari. Dana dala, aurreko denporaldian erakutsiko errendimendua makalagoa izan zan, eta igoteko postuetatik urrun amaitu eben denporaldia. Denporak emoten dauan ikuspuntutik, Escobalek uste dau, ez igoteak mesede egin eutsola kuadrillari, oso talde gaztea diralako.
Bardintasunari jagokonez, Escobalek uste dau, pixkanaka-pixkanaka bada be, arraunean aurrerapausoak emon dirala bardintasunaren esparruan. Dana dala, arraunlariak dino bardintasun falta gehiago igarten dala beheko mailetan goiko mailetan baino. Beraz, desbardintasuna nabarmenagoa da ETE ligan Euskotren Ligan baino.
