Eutanasia legeztatu ostean, osasun arloko profesionalek erronka handi bati egin behar izan deutse aurre: heriotzaren inguruko erabagiak zelan hartu eta zelan lagundu pazienteak duintasunez hiltzen. Mikel Baza medikuak bere esperientzia pertsonal eta profesionala partekatu dau Lau Haizetara irratsaioan eta agerian itxi dau horrelako kasuak ez dirala errazak, baina bai beharrezkoak ulertzeko eta tratatzeko ikuspegi zabal eta gizatiar batetik.
“Eutanasia ez da inpultsu bat, badago prozesu bat: deliberazinoa, prozedura legal bat, ebaluazino medikoak…”, azaldu dau Bazak. Era berean, azpimarratu dau profesionalen arteko lankidetza funtsezkoa dala: “Alkarregandik ikasten gabilz, trebatzen eta hausnartzen. Ezinbestekoa da pazientearen sufrimendua entzutea, epairik bota barik”.
Mikel Bazak kasu zehatz baten barri be emon dau: 68 urteko emakume baten eutanasia eskaeraren inguruko prozesua. “Gaztarotik baeukan gaixotasun degeneratibo bat. Azken urtean iktus batek jota, ia erabateko mendekotasuna eukan: gurpildun aulkian egoan, laguntza behar eban garbitzeko, janzteko, jateko… Iktusa jasan eta berehala, eutanasia eskaerea egin eban. Beste aukera batzuk eskaini arren, berak ez eban gura bere egoera barrira egokitu”, gogoratu dau medikuak. Horrelako kasuek profesionalengan be eragin emozionala daukiela onartu dau, eta osasun langileek euren burua zaintzea ezinbestekoa dala azpimarratu dau.
Gizarteak hondino beldur eta zalantza asko daukaz eutanasia gaiaren inguruan. Horregaitik, Mikel Bazak dei egin dau gaiari buruz hitz egiteko, heriotza eta bizitzaren inguruko ikuspegia zabaltzeko.
