Athletic bikain dabil 2025-26 denporaldiaren hasieran, hiru garaipen lortuta lehen hiru jardunaldietan. 2009-10 denporalditik ez da hain ondo hasi talde zuri-gorria. Ganera, hirugarren garaipena aurkari gogor baten zelaian eskuratu dabe zuri-gorriek. Izan be, orain dala zortzi urte irabazi eban azken aldiz Athleticek Betisen zelaian. Esan beharrik ez dago liga hasieran lortutako hiru garaipenek sekulako indarra emongo deutsela taldeari, datorrenari aurre egiteko.
Beñat Prados eta Oihan Sancet zelairatu dauz Ernesto Valverdek La Cartuja estadioan, Iñigo Ruiz de Galarreta eta Maroan Sannadiren ordez. Lehenengo zatia oso nahasia izan da. Talde biek oso goian presionatzen eutsoen aurkariari, arnasa hartzeko aukerarik emon barik. Lehen zati osoko gol aukera garbiena Athleticek euki dau. Berenguerrek pase bikaina sartu deutso Iñaki Williams eta bakarrik geratu da Betisen atezainaren ate aurrean. Aurrelari zuri-gorriak, ostera, ez dau asmau baloia sareetara bialtzen. Betisek, ezer gitxi egin dau Unai Simonen ate aurrean.
Bigarren zatian talde biak nekearen eragina igarten hasi dira -Betis batez be, eguaztenean Balaidosen jokatu ostean- eta apurka apurka Athletic nagusitzen joan da, lehenengo gola lortu arte. Zuri-gorrien aldeko korner baten Yuri Berchichek gogor erdiratu dau ezker aldetik eta Marc Bartrak bere atean sartu dau baloia, urruntzeko ahaleginetan dabilela. Handik gitxira, Paredesek Athleticek bigarrena sartu eta erdi erabagita itxi dau norgehiagoka. Luzapenean, ostera, Bakanbuk bere taldearen gola sartu dau eta etxeko taldeak sakatu egin badau be, zuri-gorriek eutsi egin deutsoe garaipenari. Azken minutuetan, partiduko epaileak txartel gorria erakutsi deutso Valverderi.
