63 egun falta dira 24. Korrika hasteko, baina prestakuntzak ez dauka etenik, Ane Elordi koordinatzaileak esan deuskunez. Antolatzaileek pasa dan eguenean aurkeztu eben Atharratzen hasi eta Bilbon amaituko dan ibilbidea. Aurtengo edizinoak 2.175 kilometro egingo ditu, 11 egunetan zehar, martiaren 19tik 29ra. Horretarako, 3.436 errelebo beharko dira.
Esan bezala, lasterketa martiaren 29an amaituko da Bilbon, baina 25ean sartuko da Bizkaian, Ondarroatik. Abestiari jagokonez, Pello Reparazek, Maixux Zugarramurdik eta Erramun Martikorenak jarri deutsie ahotsa Korrikari, ‘Xiberutikan Mendebaldera’ abestiaren bitartez. Elordik esan deuskunez, hartuemon bikaina euki dabe prozesu osoan zehar artistekaz.
