Suteei aurre egiteko prebentzino neurrien eta gakoen barri emon deusku Iñigo Aldasorok, Su Eskola Fundazioko zuzendariak. Etxe barruko suteetan, garrantzitsuena ez da sua amatetea, bizitzea salbetea baino. Horretarako, prebentzinoa da lehen pausua. Urtero udagoienean tximiniak garbitzea da egitekoetariko bat, kreosotarik ez pilotzeko. Garbitu ezean, lehenengo piztean sua sortu daiteke, eta ondoriorik okerrenak ekarri.
Suteak etxe barruan harrapatzen gaituenean, lehenengo eta behin baloratu behar dogu: urteteko modurik badaukagu? Baietza bada, urten, atea ondo itxi, eta giltza hartu. Ezinezkoa bada, keak guztiz bete badau etxea, logela batera joan, ate guztiak itxi, eta leihora hurreratu. Leiho edo balkoirik badago, hortik erreskatauko gaitue suhitzaileek. Kea da suteetan heriotza gehienen erruduna. Horregaitik, konfinauta egotea sarritan seguruagoa da, urteteko ahalegin itsua baino. Suhiltzaileek gaur egun teknologia barriak darabilez sute kontuetan: arnasketako ekipoak, traje bereziak eta estrategia konbinazinoak suari kanpotik eta barrutik aurre egiteko.
Aldasorok hezkuntzaren garrantzia be nabarmendu dau. Eskola umeekin asko lan egiten dabe: bideoak, esperientzia praktikoak eta jolas bidezko sentsibilizazinoa. Enpresa eta herritarentzako formazino praktikoa be eskaintzen dabe Su Eskolan, Oiartzunen eta Ispasterren. Suari aurre egiteko, estintore eta mangerekin benetako praktikak egiten dira Ispasterreko parkean, adibidez, ikasleak eta profesionalak prestatzen dabez benetako egoeretan jarduteko.
Klimaren aldaketak eta bero-boladek arriskua handitzen dabe, ez bakarrik etxe barruko suteetan, baita baso-suteetan be. Horregaitik, gizarte osoaren ardura da kontzientzia hartzea, eta prebentzinoaren kulturea zabaltzea. Aldasorok dinoan moduan: “Ez da nahikoa sua amatetan jakitea, bizia salbetan jakitea da benetan garrantzitsua.”
