Joan dan martiaren 14an Loaren Munduko eguna ospatu zan. Horren harira, Bizkaia Irratiko Lau Haizetara irratsaioan, Mikel Baza medikuagaz egin dogu berba. Bazak loaren garrantziaz eta lo egiteko ohitura onen inguruan berba egin dau.
Osasun Sailaren azken datuen arabera, euskal herritarren erdiak lo-nahasmenduak daukaz. Mikel Bazak azaldu dauanez, lo egiteko ohiturak edadeagaz aldatzen doaz, eta loaren kalidadea ordu kopurua baino garrantzitsuagoa da. Horrez gain, edadean gora egin ahala, loa azalekoagoa bihurtzen da: errazago esnatzen gara, lo hartzea gehiago kostetan jaku, lehenago esnatzen gara… Lo-arazoen arrazoi nagusiak estresa, bizi-erritmoa eta ohitura txarrak izaten dira. “Kafeina, alkohola edo bestelako estimulagarriak kontsumitzeak, baita pantailen erabilerak be, loaren kalidadea kaltetzen dabe”, ohartarazo deusku Mikel Bazak. Era berean, lo falteak osasunean daukazan ondorioak be aitatu dauz: esaterako, antsiedadea, konzentrazino-arazoak edota gaixotasun kardiobaskularrak.
Familia medikuak lo-ohitura osasungarriak izateko aholku batzuk be emon dauz: ordutegi erregularra izatea, pantailak saihestea, giro lasaia mantentzea edota errutina jakin bat jarraitzea. Horrezaz gain, ariketa fisikoa egitea edota elikadura egokia izatea be lagungarriak dirala azpimarratu dau Mikel Bazak.
