Lemoizko Udalak eta Labayru Fundazioak Lemoizko Sarakoetxe: lehenaren itzala gogoan ikus-entzunezkoa aurkeztu dabe. Dokumentalak Lemoizko Sarakoetxeko erromeriaren memoria historikoa berreskuratu gura dau, herriko eta inguruko biztanleen testigantzen bitartez.
Akaitze Kamiruaga Labayru Fundazioko kide eta proiektuaren arduradunak azaldu dauanez, egitasmoa hainbat urtez lantzen ibili dira. 2022. urtean lemoiztar talde batek jaia berreskuratzeko lehenengo saioa egin eban, eta ondoren, Udalaren laguntzeagaz, badira hiru urte Sarakoetxeko erromeria ospatzen dala. Erromeria hau orain dala 50 urte inguru desagertu zan, Iberduerok zentral nuklearra eregiteko baserriak eta lurrak erosi ebazanean.
Erromeria xumea baina esanguratsua
Kamiruagak azaldu dauanez, erromeria ez zan bereziki handia, baina oso garrantzitsua zan Lemoiz, Bakio, Mungia, Maruri-Jatabe eta inguruko herrietako biztanleentzat. Irailaren 8an ospatzen eben, Andra Mari egunean. Auzokoek Marutxeaga baserriko ataria apaintzen eben mezatarako. Ama Birjinaren irudia eroaten eben eta aldare bat atontzen eben. Meza ospatu ondoren, bazkaldu, eta ondoren dantza eta jai giroa izaten ziran. Garai haretako ohituren artean, eskota izenekoa nabarmentzen da. Ohitura honen arabera, auzoko mutil gazteak dirua batu eta ardo zahagiaren bila joaten ziran. Idi gurdi baten ekarten eben zahagia, eta gero, erromerian batutakoen artean banatzen zan ardoa.
Memoria historikoa berreskuratu gurean
Lemoizko Udalak Lemoizko Sarakoetxe: lehenaren itzala gogoan dokumentalagaz Sarakoetxeko erromeriaren memoria berreskuratu gura dau, herriko belaunaldi barriek bere garaian galdu zan identidade historikoaren eta kulturaren barri euki dagien. Erromeria galtzea “traumatikoa” izan zan auzokoentzat eta lemoiztar guztientzat, Akaitze Kamiruagaren esanetan.
