Emakumeen Kontrako Indarkeriaren Aurkako Nazinoarteko Eguna da zemendiaren 25a. Horren harira, Miren Elgarresta Emakundeko zuzendariagaz egin dogu berba Bizkaia Irratiko Goizeko Izarretan irratsaioan. Elgarrestak urteko balantzea egin dau eta esan deusku bardintasunaren esparruan emondako urratsak nabarmenak dirala, baina eszenatoki barri batera heldu garelakoan dago.
Eszenatoki barri horretan, ultraeskuinagaz lotutako “korronte neomatxista” sortzen eta hedatzen hasi da, feminismoak lortutako aurrerakuntzak bertan behera uzteko asmoz. Edozelan be, gizartean gai honen ganean dagoan kontzientzia geroz eta nabarmenagoa da orokorrean. Horren harira, salaketek gora egin dabe, oindino kasuen %85 salatu barik gelditu arren.
Emakumeen kontrako indarkeria gizarteko esparru askotan dago presente. Esaterako, EUDELek emondako datuen arabera, emakumezko 10 alkatetik seik indarkeria motaren bat jasan dabe. Hori dala eta, Euskadiko Udalen Elkarteak 33 neurriz osotutako plan bat helarazo deutse udalei.
