Cristina Tonettik (2002, Besana Brianza) bere talentua eta gaztetasuna gehituko deutsaz LABORAL Kutxa-Euskadi Fundazinoa taldeari datorren urtetik aurrera. Txirrindulari italiar gazteak bi denporaldirako sinatu dau, 2024 eta 2025.
Tonettik, txirrindularitza italiarraren etorkizunik handienetakoa dauenak, lehen urratsak emon dauz profesionaletan Top Girls Fassa Bortolo taldean (2022 eta 2023), eta orain LABORAL Kutxa Euskadi Fundazinoa aukeratu dau, nazinoarteko egutegiko lasterketa onenetan txirrindulari lez daukazan doaiak eta dauen maila erakusteko. Taldearentzat etorkizuneko apustua da eta, aldi berean, Tonettik taldea klasikoetan eta erlojupeko probetan indartuko dau. Aste honetan, Etorkizuneko Tourrean lehiatzen da Italiako selekzinoagaz.
Txirrindulari azkarra da eta, nahiz eta gaztea izan, Giroko azken bi ekitaldiak lastertu dauz eta UCIko probetan podiuma zapaldu dau eta hainbat aldiz sailkatu da aurreneko hamarren artean. 2023an, Italiako erlojupeko taldekako txapelduna eta 23 urtez azpiko txapeldunordea izan zan; bigarren izan zan Trofeo Ponente egin Rosa eta GP Liberazione klasikoetan, laugarren La Classique Morbihanen eta bosgarren Trofeo Oro egin Euro lasterketan. Bere aita, Gianluca Tonetti, profesionala izan zan 1989 eta 2005 artean. Tonetti bosgarren fitxaketa da datorren denporaldirako, Laura Tomasi, Ane Santesteban, Catalina Soto eta Jessenia Meneses txirrindularien ondoren.
