Athleticek olatuaren gainean jarraitzen dau. Talde zuri-gorriak Marcelino Garcia Toralen Vila-Real menderatu dau San Mamesen, ligako hamaseigarren jardunaldian (2-0). Partidu gogorra izan arren, Athletic Castelloko taldea baino gehiago izan da eta merezidutako beste hiru puntu eskuratu ditu. Horrela, Athleticek 32 puntu ditu dagoeneko eta sailkapeneko laugarren postuari eusten deutso.
Sorpresa gitxi egon dira Athleticeko hasierako hamaikakoan. Julen Agirrezabala Valverdek aukeratutako atezaina izan da barriro eta Nico Williams ordezkoen artean gelditu da. Williams anai txikiaren ordez Alex Berenguerrek jokatu dau. Athletic golaren bila atera da zelaira, norgehiagoka hasi bezain pronto. 15. minutuan, Aitor Paredesek lehoien lehen gola sartu dau, Iñigo Ruiz de Galarretak jaurti dauan korner batean baloia sareetara bialduta. Vila-Real bardinketaren gola sartzeko gai izan da jarraian, baina Gueye jokoz kanpo egoan. Halanda be, beste aukera garbi bat euki dau kanpoko taldeak, baina Agirrezabalak geldiketa ederra egin deutso Yeremy Pinori.
Partiduaren egoerea ikusita, Marcelinok aldaketa bikotxa egin dau atsedenaldian, bardinketaren gola sartzeko asmoz. Vila-Realek norgehiagokaren kontrola euki dau bigarren zatiko lehen minutuetan, baina ez da gol aukerarik sortzeko kapaz izan. Bardintasuna nagusi zanean, Iñaki Williamsek Athleticen bigarren gola sartu dau, 69. minutuan, Oihan Sanceten pase sakona jaso eta gero. Ganera, golaren jokaldian Diego Conde Vila-Realeko atezaina lesionatu egin da. Azkenean, Athleticek margailuari eutsi deutso eta garaipena San Mamesen gelditu da.
Istanbulera osterea
Atleticek Jose Mourinhok zuzendutako Fenerbahceren aurka jokatuko dau eguaztenean, arratsaldeko 16:30etan, Europa Ligako seigarren jardunaldian. Momentu honetan, Athletic sailkapeneko bigarren postuan dago, Europa Ligako liga fasean. Beraz, final-zortzirenak jokatzeko sailkapen zuzena lortu gura dau talde bizkaitarrak. Ostean, Athleticek derbi bi jokatuko ditu jarraian, biak etxetik kanpo. Hurrengo domekan Alavesen kontra jokatuko dabe bilbotarrek Gasteizen, Osasunaren estadiora osterea egin aurretik.
