Planik Plan irratsaioaren emonaldi barri bati ekin deutsagu asteon Bizkaia Irratian. Barikuro, astegoienean zehar Bizkaiko txoko desbardinetan egongo diran ekintzen eta egitasmoen errepasoa burutzen dogu, geure lurraldean zer egongo dan jakin eta gura dozuen plana egin daizuen. Astegoien honetatik Abba Generation dalakoaren kontzertua, Mungiako San Antontxu azokea eta Mungiako Lapikoko eguna nabarmendu doguz.
Barikua
Astegoien honetan plan asko egongo dira egiteke Bizkaian, barikutik hasita. Arratsaldeko 19:00etan hasiko dira egitasmoak. Ordu horretan, ekitaldi bi eroango dira aurrera. Batetik Bilboko Jazzon aretoan, Velasquartet musika taldea izango da protagonista. Bestetik, Getxoko Romo Kultur Etxean, musikea be protagonista izango da, ‘Unamuno, bertsoak eta prosa’ dalakoaren eskutik. Ordubete beranduago, arratsaldeko 20:00etan, Abba Generation musika banda egongo da Bilboko Campos Eliseos antzokian.
Zapatua
Hainbat ekitaldi ezbardin izango dira protagonista zapatu honetan Bizkaian. Esaterako, San Antontxu azokea ospatuko dabe Mungian. Arratsaldeari jagokonez, 17:00etan, ‘Intxaur kraskagailua‘ ikuskizuna ikusi ahalko da Bilboko Campos Eliseos Antzokian. Musikari jagokonez, gaueko 22:00etan, Kerobia bandak kontzertua eskainiko dau Bilboko Kafe Antzokian, Negufest ekimenaren baitan.
Domeka
Astegoieneko azken egunari begira, hainbat ekitaldi izango dira Bizkaian. Domekan be jaia eguna izango da Mungian, Lapikoko Eguna ospatuko dabe-eta bertan. Horren harira, Mungiako Euskal Pizkundeko karpan, bertso saioa egongo da Aitor Etxebarriazarraga, Alaia Martin, Unai Iturriaga eta Aitor Esteban bertsolarien eskutik. Ganera, Santurtziko Serantes Kultur Aretoan, Moko antzerkia antzeztuko dabe, eguerdiko 12:30etan. Azkenik, astegoienari agur esateko, arratsaldeko 20:00etan, Bilboko Euskalduna Jauregian, The Vipers Queen Tribute taldearen kontzertua entzun ahalko da.
