Valentziako hondamendiak Pradales eta Sanchezen batzarra atzeratu ostean, Lehendakaria eta Espainiako presidentea zemendiaren azken astean batzartuko dirala uste dau Estebanek. “Gizarte Segurantzaren eskumena lehenengo batzar honetan ezingo da gauzatu baina Itsasaldearen eskumenari urtenbidea bilatu behar deutsagu eta hurrengo batzarrean konponduta egongo dan itxaropena daukat” adierazo dau EAJko ordezkariak.
Aurrekontuak
Azken asteetan ikusitako detaile batzuek Espainiako Gobernuak 2025erako aurrekonturik eukiko dauen zalantzea piztu deutse Aitor Estebani. Podemosek bere oinarriei galdetutakoak edo Esquerraren kongresu barriak aurrekontuen etorkizunean eragina euki leikiela uste dau Kongresuko bozeroale jeltzaleak. “Datorren urtearen hasieran ikusiko dogu aurrekontuak bideragarriak diran ala ez. Euskal taldeak ez gara traba handia izango. Lortu ezkero Sanchez legegintzaldia amaitzen moldatuko dala uste dot” azaldu dau Aitor Estebanek.
EBBko hurrengo presidentea
EAJko presidenteak, Andoni Ortuzarrek, urtarrilean bere etorkizun politikoa argituko dauela emoten dau. Ortuzarrek jarraituko ez baleu, Aitor Estebanen izenak urten dau kiniela baten baino gehiagotan. EBBko hurrengo presidenteak euki beharko leukezan dohaiez galdetuta, Estebanek dino herri honetako politikea eta EAJ bera ondo ezagutzen dauzen pertsona bat izan beharko litzatekela. “Orain arte euki doguzan dohai berak eukitea eskatuko jako eta jendeak pertsona horrengan konfiantzea eukitea be. Ikusiko dogu bere momentuan” esan dau Aitor Estebanek.
Otsoaren populazinoaz, erregai fosilen etorkizunaz, lan astearen murrizketaz, argitu barik dagozan ETAren zein GALen atentaduei buruz etabar luzeaz galdetu deutsagu gaur EAJko Aitor Estebani Gorbeiako Parke Naturalaren parketxetik egindako Goizeko Izarretan irratsaioan.
