Aurreko astean jakin gendun Guggenheim Urdaibai proiektuaren ganean, Hezeguneentzako Mediterraneoko Aliantzak, alerta gorria piztu dauala biosferaren erreserban. Biosferaren erreserban museoak dakarren mehatxua aipatzen dabe hain zuzen. Guggenheim Urdaibai Stop plataformak egindako deiaren ostean etorri da alkarte honen erantzuna. Eider Gotxi, plataformako kidearentzat, honek, gatazkea internazionalizatzea dakar. Zientzilari eta ikertzaileen manifestua be onartu da eta sinadurak dabiz batzen.
Batzarra Miren Arzalluzegaz
Maiatzaren 18an, museoen nazinoarteko egunean, Guggenheim Urdaibai Stop plataformak Bilboko museoaren aurrealdean deitu eban agerraldia. Aurretik, maiatzaren 9an, Bilboko museoko zuzendari barriagaz batzartu ziran. Miren Arzalluz entzuten dakien pertsonea dala azpimarratu dau Gotxik. Patronatoak oraindino ez dau Urdaibaiko museoaren ganeko erabagirik hartu eta Arzalluz bera be egitasmoa aztertzen dabil. Zintzoak izanik, Gotxik dino, ezin izango dabela onartu museoa Urdaibain egitea.
Herritarrak entzuteko prozesua
Agirre Lehendakari Centerrek bitartean, abian dauka zezeiletik Urdaibaiko herritarrak entzuteko prozesua. Mila pertsona alkarrizketatzea da asmoa. Museoaren proiektua aurkeztu ez dan arren horretaz itauntzen dabiz. Erakundeak eurak prozesu honen bultzatzaileak direla jakinda, Guggenheim Urdaibai Stop plataformatik dei egin dabe parte hartzera. Hileotan plataformak berbaldiak eskaini dauz Urdaibaiko herrietan. 21 eskeini dabez guztira eta jende asko batu da bertan. Aurrera begira, alderdi politiko, erakunde eta sindikatukaz egoteko asmoa daukie. Epaitegietan hasitako bideak aurrera jarraitzen dau eta Gernika-Lumo, Foru eta Muruetako Udalek adostutako plana argitaratzeko zain dagoz, alegazinoak aurkeztu ahal izateko.
