Ana Goitia kazetari eta umoregile lekeitiarrak zemendiaren 7an estreinauko dau “Katana” izeneko bakarrizketa barria.“Barre Librea” saioan hasi zan Ana Goitia bakarrizketak eskaintzen. Antton Telleriak animauta herriz-herri eskaintzeari ekin eutson orain urte bi. 10-15 minutukoak izan dira orain artekoak baina “Katana”k ordu beteko iraupena izango dau. Honegaitik bakarrik umoregileak urduri baina pozik dagoala esan deusku. Bakarrizketa barriaren izenburuaz itaunduta, umoregileak esan deusku japoniar jatorriko labanagaz daukala loturea. Gai desbardinak zorrotz aztertzeko prest dago.
Gai desbardinak
“Katana” bakarrizketan, musikeak presentzia handia izango dau eta gai desbardinak jorratuko dira; gurasoen papera, matxismoa, lodifobia…azken gai bi honeek aipatzerakoan, egileak, ikusleen artean hausnarketea eragin gurako leuke bide batez. Barre eragiteko zerk funtzionetan dauan galdetzerakoan Ana Goitiak argi dauka norbere buruari barre egin eta berba garbi egitea dala bidea. Orexan izango da “Katana”ren estreinaldia zemendiaren 7an. Donostian eta Aretxabaletan izango da ostean. Ana Goitiak esan deuskunez Bizkaian be eskeiniko dau bere bakarrizketa barria. Datak ixten dabil horretarako.
