Bizkaigaineko gaztandegiko Elur maluta gaztaia Euskal Herriko gaztairik onena izendatu dabe, Tolosan egindako ESNEKIren bosgarren edizinoan. Gazta bigunaren kategorian lehiatu da Errigoitiko gaztandegiko produktua, eta txapeldunen txapeldunaren aitortza be jaso dau.
Guztira, Euskal Herriko zazpi lurraldeetako 35 gaztandegik aurkeztutako 91 produktu lehiatu dira aurtengo txapelketan, zortzi kategoriatan banatuta. Ekimenagaz batera, 26 postuko gaztai eta V. ESNEKI azoka egin dabe Tolosako Trianguloa plazan, baita dastatze gidatuak eta familientzako hainbat jarduera be.
Esnekiren helburua Euskal Herriko gaztai eta esnekien kalidadea eta aniztasuna ezagutarazotea da, baita tokiko ekoizleen lana eta lehen sektorearen garrantzia nabarmentzea be.
