Eusko Jaurlaritzako Osasun Sailak, Biobizkaia, Bioaraba eta Biogipuzkoa Osasun Ikerketako Institutuen bitartez, Edonola ikerketa-proiektua martxan jarriko dau. Linfoma daukien pazienteen ariketa fisikoaren onurak aztertuko dabez. Immuno-kimioterapiako tratamendu aktiboan dagozan 180 pertsonak hartuko dabe parte proiektuan. Durangoko kirol-instalazinoak izango dabez eskura, ariketa fisikoa egin ahal izateko.
Linfoma, bosgarren minbizi ohikoena da Euskadin, eta azken hamarkadetan gorantz egin dau. Gaur egun, 15-19 kasu dagoz 100.000 biztanleko. Egungo tratamenduek erantzun-tasa handiak eskaintzen dabezan arren, albo-ondorioak (nekea, depresinoa eta ongizatearen murrizketa) esanguratsuak dira. Ikerketa askok dinoe kirolak sistema immunologikoan eragin positiboa izan leikela.
Mireia Elkoroiribe Durangoko alkateak Lau Haizetara irratsaioan azaldu dauanez, proiektuan parte hartuko daben pazienteek kirol-saio gidatuak jasoko dabez. Besteak beste, indarra, mugikortasuna edota entrenamendu aerobikoa landuko dabe. Gaixoek inmunidade sistema ahulduta izaten dabenez, talde txikietan, gela espezifiko baten, edo era indibidualizaduan jasoko dabez kirol saioak. Osasun Sailak eta Durangoko Udalak hitzarmena sinatu dabe horretarako. Oso pozik azaldu da Elkoroiribe udalerrian ikerketa-proiektu hau hartzeaz.
