Bizkaiko Txakolina Jatorrizko Deituraren Forum Laboral Kutxaren bederatzigarren edizinoa egin da gaur, ‘Mildiu madarikatua II – Etsaia ezagutuz’ izenburupean. Mahastizain, upategi, teknikari eta sektoreko eragileei zuzendutako jardunaldi teknikoa Bakioko Txakolingunean, Txakolinaren museoan egin da. Topaketan mahatsondoaren mildiuaren arazoa landu da, sektorearen erronka nagusietako lez, eta arreta berezia jarri da kliman oinarritutako faktoreetan, detekzino goiztiarrean eta kontrol jasangarriko estrategietan.
Andoni Aretxabaleta Lezamako Magalarte upategiko arduraduna da, eta baita Bizkaiko Txakolina Jatorrizko Deituraren Kontseilu Erregulatzaileko eta Mahai Teknikoko kidea be. Aretxabaletak nabarmendu dau garrantzi handia daukiela jardunaldi honeek, adituek, ardaogileek eta sektoreko egileek alkarregaz esperientziak eta ezagutzak partekatzeko. Bizkaian, mildiua, mehatxu bihurtu da eta horren kontra borrokatzeko, ardaogileek gero eta eraginkorragoak diran metodoak bilatzen dabez.
