Mundu bete jai proiektuan beste herrialde batzuetako kulturetako jaiak eta ospakizunak batzen dira. Labayru Fundazioak eta Bilboko Udalak alkarlanean egindako proiektu honetan, sei kultura desbardinetako sei jai aukeratu, eta horreek gure artean, gure gizartean zelan ospatzen dabezan aztertu dabe: Mexikoko Hilen Eguna, tradizino islamikoaren Eid al-Fitr jai erlijiosoa, kolonbiarren Kandelatxoen Jaia, errumaniarren Egun Nazionala, txinatarren Urtebarria eta Kameruneko sawatarren Ngondo Jaialdia.
Igone Etxebarria Labayru Fundazioko zuzendariaren esanetan, “kanpotik etorritakoek eurek ospatzen dabezan jaiak ezagutu, ulertu eta partekatzeko aukerea emon gura dogu, hemengo herritarren eta kolektiboen artean zubiak eregiteko”. Proiektua ez da bakarrik jaietan oinarritzen, baizik eta jaien bitartez kultura eta identidade desbardinak ikusgarri egiteko bide bat da. “Kultur aniztasuna ospatzeko modu positibo eta parte-hartzailea da”, nabarmendu dau Labayru Fundazioko arduradunak. Liburua ezeze, sei ikus-entzunezko be prestau dabez. Mundu bete jai proiektuko bideoak Labayru Fundazioaren YouTube kanalean ikusi daitekez.
