Usune Elizondo Deustu Arraun taldeko arraunlariagaz egin dogu berba asteon Emakumeak Jokoan irratsaioan. Elizondok orain arteko ibilbide osoa Deustun burutu dau. Beraz, taldeko beteranoen artean dago. Arraunlari bilbotarrak 2015ean ekin eutson bere ibilbideari eta gaur arte luzatu dau, 2019 eta 2020 denporaldietan atsedena hartu arren.
Beraz, zortzi denporaldi burutu ditu Deustuko lehen taldeagaz. Guztira, 142 estropadetan bogatu dau eta Kontxako Banderan be parte hartu izan dau. Azken denporaldian, ETE ligan izan zan Deustu. Ganera, sailkapenari erreparatuta, atzera pausoa emon eban traineru bizkaitarrak azken denporaldian. Deustuk seigarren postuan amaitu eban denporaldia, 37 puntu eskuratu eta gero.
Edozelan be, asmo handiko helburuak ditu Elizondok etorkizunari begira. Arraunlariak esan deuskunez, talde lehiakorra osotu dabe aurtengo denporaldiari begira. Beraz, epe ertainera eta luzera begira, Euskotren Ligan bogatu gurako leuke Elizondok Deustugaz. Oso gatxa dala jakin arren, lanagaz mugak hautsi ahal diralakoan dago.
