Athleticek aukera bikaina galdu dau Mallorcaren zelaian garaipena eskuratu eta jauzi handia emoteko sailkapenean. Valverderen taldeak hamar jokalariren aurka jokatu dabe lehen zatiko hogetalaugarren minutuan epaileak Samu Costari txartel gorria erakutsi eutsanetik. Hortik aurrera, Mallorcak bere atea defenditzeari ekin deutso eta ondo bete dau bere lana zuri-gorriek ezin izan dabe-eta golik sartu. Nico Williams eta enparauek ahalegin handiak egin dabez Jagoba Arrasatek antolatutako hormea hausteko baina ez dira fin ibili azken metroetan. Partiduaren azken minutuetan euki dau Athleticek aukerarik garbiena, Williams anai gazteak langara jaurti dauenean. Aldaratzea Berenguerrek hartu eta nafarraren jaurtiketea kanpora joan da. Atzoko partiduak barriro erakutsi eban sarritan hamarren aurka jokatzea ez dala bape bape erraza izaten.
Etxeko taldeak indartsu ekin deutso partiduari eta bigarren minutua bete barik egoanean, Julen Agirrezabalak Mallorcaren gola saihestu dau. Muriquik aurrelari kosovarrak ederto baliatu dau eskoitik jasotako baloia baina haren jaurtiketeari erantzun bikaina emon deutso Athleticeko atezainak. Zuri-gorriak ez ziran fin ibili lehen minutuetan baina laster hartu dabe jokoaren kontrola. Nagusitasun horrek, ostera, ez dau islarik izan markagailuan. Nico Williamsek sareetara bidali dau baloia lehen zatiaren azken txanpan baina epaileak balio barik itxi dau gola, aurretik baloiak zelaitik urten dauelako.
Ernesto Valverdek Berenguer eta Djalo zelairatu ditu Sancet eta Guruzetaren ordez, erasoko jokoa indartzeko asmoagaz. Aldaketek, baina, ez dabe aldaketa handirik ekarri zuri-gorrien jokoan. Iñaki Williamsek sareetara bialdu dau bere anaiak ezkerretik egindako erdiraketea baina epaileak balio barik itxi dau gola, Athleticeko aurrelaria jokoz kanpo egon dalako jokaldiaren hasieran. Arestian esan bezala, zuri-gorrien aukera garbienak partiduaren azken txanpan etorri dira baina hareen ahaleginak ez eban saririk jaso. Kontuak kontu, botilea erdi beterik ikusi gura badogu, Athleticek puntu bat lortu dau etxetik kanpo zelai gatx baten. Botilea erdi hutsik ikusi gura badogu, Valverderen taldeak aukera bikaina galdu dau Mallorcan irabazteko. Zoritxarrez, atzokoak ez dira Athleticek bidean itxi dituen lehen puntuak.
