Guggenheim Bilbao Museoaren Patronatuak Miren Arzalluz (Bilbo, 1978) izendatu dau gaur museoaren zuzendari nagusi, azken hileetan osotu dan hautaketa-prozesua burutu ostean. Patronatuak Arzalluz aukeratzearen arrazoien artean dagoz, berak nazinoarteko kultur-erakundetan daukan esperientzia eta horri esker lortu dauan aintzatespena; Museoaren proiektuagaz epe luzerako konpromisoa hartzeko borondatea; Museoa herrialdea eraldatzeko estrategian giltzarria izateko helburuagaz bat etortzea; eta Museoak lan egiten dauan testuinguru kulturalekiko sentsibilidadea erakustea, tokiko balioak eta balio globalak integratzeko gaitasuna baliatuta.
Miren Arzalluzek Deustuko Unibertsidadeko doktoregoa dauka Historian. Artearen Historiako Masterra egin eban The Courtauld Institute of Art-en eta Politika Konparatuan Masterra London School of Economics-en. Gaur egun Palais Galliera-Parisko Modaren Museoaren zuzendaria da.
Miren Arzalluz nazinoartean lortutako aintzatespena bestelako lorpenek egiaztatzen dabe: 2024an Frantziako Kultura Ministerioak Chevalière de l´Ordre des Arts eta des Lettres izentau dau, eta oraintsu Ameriketako Estatu Batuetako diseinu-sari nazionaletan epaimahai izentau dabe, New Yorkekko Smithsonian-eko Cooper Hewitt Diseinu Museoak emoten dauazan National Design Awards 2025eko sarietarako.
Apirilaren 1ean hartuko dau kargua
Miren Arzalluz Zuzendari Nagusi Hautetsi izentauko dabe 2025eko martiaren 1ean eta izendapenak egun horretatik aurrera izango dau eragina. Lau astez, apirilaren 1era arte, murgiltze-prozesu bat egingo dau Bilboko eta New Yorkeko Guggenheim museoetan, Juan Ignacio Vidarte Museoko Zuzendari Nagusiagaz batera. Apirilaren 1ean Miren Arzalluzek Zuzendari Nagusi kargua hartuko dau, erantzukizun osoz.
