Durangoko Bizenta Mogel liburutegiak astronomiaren inguruko jarduera bereziak antolatu dauz maiatzaren 21etik ekainaren 1era bitartean egingo dan Bi iluntzeen eguna erakusketeagaz batera. Ezkurdi plazan aire zabalean ikusgai egongo dan erakusketeak, eklipseak eta astronomia herritarrengana modu erraz eta erakargarrian hurreratzea dau helburu.
Eklipseak eta zerua gertutik ezagutzeko aukerea
Erakusketan ilustrazino zientifikoak eta dibulgazino edukiak egongo dira publiko guztiari zuzenduta. Antolatzaileen esanetan, helburua da eklipseak zelan sortzen diran modu ulergarrian azaltzea eta zerua behatzeko zein zientziarako jakin-mina piztea.
Programazinoaren barruan, Durangoko ikastetxeetako Lehen Hezkuntzako bosgarren mailako ikasleentzako bisita gidatuak egingo dira. Virginia García Pena Aranzadi Zientzia Elkarteko kideak gidatuko dauz saioak, maiatzaren 22an, 25ean eta 26an. Zabalarra, Jesuitak, Kurutziaga Ikastola, San Antonio eta Nevers ikastetxeetako ikasleek hartuko dabe parte.
Astronomia, artea eta natura batuta
Bestalde, Bizenta Mogel liburutegiak izena emoteko epea zabalik dau dagoeneko erakusketearen inguruan antolatutako jardueretarako. Horreen artean nabarmentzekoa da Ziano-Astro-Tipia tailerra. Proposamen horrek artea, natura eta astronomia batuko dauz zianotipiaren teknikearen bidez. Parte-hartzaileek argiaren bidez irudiak sortzeko prozesua ezagutuko dabe, elementu astronomikoak eta landarak erabiliz. Bi saio antolatu dira:
- Lehenengoa maiatzaren 23an izango da, goizeko 11:00etatik 13:00etara, 8 urtetik gorako umeentzako eta heldu baten laguntzeagaz.
- Bigarrena maiatzaren 28an egingo da, arratsaldeko 18:00etatik 20:00etara, helduei zuzenduta.
Bisita gidatuak herritarrentzat be
Horrez gain, maiatzaren 25ean herritar guztientzako bisita gidatuak eskainiko dira, Virginia García Penaren eskutik. Euskerazko bisitea 18:00etan izango da, eta gaztelaniazkoa 19:00etan.
Jarduera guztietako lekuak mugatuak izango dira, eta aurretik izena emon beharko da biblioteka@durango.eus helbide elektronikora idatzita. Eskariak izen-emote hurrenkeraren arabera hartuko dira kontuan, lekuak bete arte.
