Emakumeentzat gero eta arreta zerbitzu gehiago izateak, salaketak areagotzea ekarri dau Emakundeko zuzendariarentzat. Espainiako Botere Judizialaren Kontseilu Nagusiko biolentziaren ganeko Behategiak egin dauan txosten batek dino, EAEn %20 egin dabela gora emakumeek jarritako salaketek. Azken hiru hileetan 1590 kasu zenbatu dira. Miren Elgarresta Emakundeko zuzendari barriak Bizkaia Irratiari esan deutso, emakumeentzat gero eta arreta zerbitzu gehiago egoteak, salaketak areagotzea ekarri dauala.
Txokoetako diskriminazinoa
Bestalde, txoko batzuetan emakumeek sarrerea galazota eukitearen ganean be egin dogu berba Emakundeko zuzendariagaz. Gogoratu, aurreko astean gertatu zala Bilboko txokorik zaharrenean, emakume kazetari bati ez eutsiela sartzen itzi. Honen ganean, Elgarrestak esan deusku, txosten bat egiten ari direla. Honetan, gomendioak emongo deutsiez alkarteari. Bide beretik jarraitu ezkero, alkarte horrek ezingo leuke diru publikorik jaso.
Kongresua Gasteizen
Bihar bitartean, “Gizonak maskulinidadeak eta politika publikoak” izeneko kongresua hasiko da Gasteizen. 15 urte daukazan “Gizonduz” ekimena aztertuko da bertan besteak beste. Miren Elgarrestaren esanetan, garrantzitsua da konturatzea, gure kulturan ontzat emon diran sinismen batzuk desbardintasunak areagotzen dabezala. Iñigo Urkullu Lehendakariak zabalduko dau bihar Gasteizeko biltzarra, 500 lagunek emon dabe izena eta maila handiko hizlariak egongo dira.
