Chernobil alkarteak ardurea agertu dau barriro Ukrainako egoereagatik. Hiru urte bete ziran astelehenean Errusiako inbasinoa hasi zanetik Ukrainan. Balizko bakearen negoziazinoak pil-pilean dagoz baina bake konponbiderik ez da heltzen. Chernobil alkartetik, Lide Alvarezek aitatu deusku ukrainarrek sufriduten jarraitzen dabela. Giza eskubideen urraketea salatu dau. Milaka eta milaka hildako izan dira urteotan eta haurrak dira krisi humanitario honen biktima nagusiak. Chernobil alkartea 1995. urtetik dabil Chernobileko hondamendiak kaltetutako eremuetan bizi diran familiakaz lanean. Urtero, udan eta gabonetan, egonaldiak egiten dabez hango umeek hemengo familietan. Gerrea dala eta, euren egoereak txarrerantz egin dau. Sirena hotsak egunero entzuten dabez eta ondorioetariko bat da ezin direla eskolara joan.
Kanpainea abian
Chernobil alkarteak, bidegabekeriak salatzeaz gain, abian dauka uda honetan umeak ekarteko kanpainea. Udako oporrak berton igaroteko erea daukie Ukrainako umeek. Orain arteko familietara etorriko dira ukrainar umeak eta familia barririk izan ezkero, gehiago etorri ahal izango dira. Interesa daukienek alkarteagaz bat egin leikie. Gauza bera, laguntza humanitarioa bialtzeko lagundu nahi dabenak be. Datorren astean edo hurrengoan izango da hirugarren bidalketa. Momentu honetan, batez be, botikak dabilz eskatzen Ukrainako familiak.
