Hizkuntz Eskubideen Behatokiak 2024. urteko txostena aurkeztu dau. Euskerearen Telefonoan jasotako intzidentziak batzen dira txosten honetan. Igaz, 1206 izan ziran guztira jasotako intzidentziak. Aurreko urteetako hutsuneak agertzen dira txosten honetan be. Kezka gehienetan, administrazino eta agintari publikoak jartzen dira fokoan. Behatokiaren arabera, besteak beste, administrazinoetatik ia ontzat emoten da euskeraz ezer jaso gura bada itxaron behar izatea.
Betikotzeko arriskua
Egunero euskeraz bizi gura dabenen kexak jaso dauz Behatokiak Euskerearen Telefonoaren bitartez. Arduratzekoa dala dinoe, euskerearekiko aitortza dagoan eremuetan jaso dabezala kezka gehienak, lege babes handiena dagoan lekuetan. Urraketak betikotzeko saiakerea antzeman dala be azaldu deusku Agurne Gaubeka Behatokiko zuzendariak. Guzti hau dala eta, dei egin deutse herritarrei normalizazino ezaren barri emon dagien. Behatokiak daukan telefono zenbakira deitu leikie edo emailez mezua bialdu.
