Euskal Herriko Unibertsidadeak (EHU) bat egingo dau beste urte batez Ikertzaileen Europako Gauagaz, Europan ospatzen dan zientzia dibulgazinorako ekitaldi handienetako bategaz. Ekimen honen ardatz nagusia ikertzaileen lana gizarteari hurreratzea da, euren zeregina eta gizarteari ekarten deutsiezan onurak ezagutarazoteko, eta baita ikasleen artean ikasketa zientifikoen aldeko hautuak sustatzea be, genero arrakalak ezabatzeko. Aurten irailaren 27an egingo da Bilboko Areatza kaian, 17:00etatik aurrera. Nobedade moduan, Bilboko Ingeniaritza Eskolearen Nautika Itsasgunean -Portugaleten- be ekintzak antolatu dabez iraileko azken barikurako.
Nerea Jauregizar ekitaldiko zuzendariak Lau Haizetara irratsaioan azaldu dauanez, Europako ia 400 uritan ospatzen da Ikertzaileen Europako Gaua. Ekimenak bost ardatz nagusi izango dauz: minbizia, ura eta ozeanoak, lurzoruaren eta elikagaien osasuna, klima aldaketarako egokitzapena, eta uri adimendunak eta klimatikoki neutroak.
