Zaporeak alkartetik azaldu deuskuenez, gero eta alkarte gitxiago dagoz Lesbosen lanean. Zaporeak-ek azken kontainerra dauka momentu honetan Lesbosera bidean. Barikuan urten zan Euskal Herritik eta hiru bat aste barru helduko da Greziara, Mediterraneoa zeharkatuta. Gaur egun, hamabi boluntario daukaz Zaporeak alkarteak Lesbosen, 6 errefuxiatu eta 6 Euskal Herriko boluntarioak. Bertan bitartean, lau mila pertsona baino gehiago dagoz asilo-eske. Plastikozko karpa eta bloke artean bizi dira. Euren egoerea jasanezina dala esan deusku Zaporeak alkarteko Helena Ruiz de Azuak. Negua, gogorra izaten ari da bertan. Egoera honeri gehitu behar jako, gero eta alkarte gitxiago dagoala Lesbosen lanean. Arazo desbardinak direla-eta, alde egiten dagoz.
Material desbardina kontainerrean
Zaporeak-ek, azken kontainerrean, elikagaiak eroateaz gain, Amaia Urberuaga donostiarrak emondako 4 garbigailu eta 3 lehorgailu be badaroaz. Urberuagak garbitegi bat eukan eta jubilau ostean itxi egin dau. Hango elektrogailuak emon dauz Lesbosera eroateko. Horrez gain, Orozkoko boluntarioek, lankidetza sinatu dabe Seyce enpreseagaz eta honi esker, orga jasotzailea lortu dabe, elikagaien paletak, kutxa handiak etabar manipuletako. Helena Ruiz de Azuak zelan lagundu daitekeen esan deusku: diruz egindako aportazinoak jasotzen dabez, elikagaiak edo bestelakoak hartzeko be bai… bestela, boluntario lana egin nahi izan ezkero be, prest dagoz jente barria hartzeko.
