Bizkaiko Correoseko garbitzaileek salatu dabe garagarriletik ez deutsiela ordainketarik egin, eta iragarri dabe datorren astean lan-ixteak egingo dabezala irailaren 11tik 14ra. Greba mugabakoa egingo dabe “egoera premineaz konpontzen ez bada”, ESK sindikatuak eguazten honetan ohar baten bidez jakinarazi dauenez.
Limpiezas J. Cordoba enpresak azpikontratautako langileek adierazo dabe Correos dala beren egoeraren “erruduna”, eta azaldu dabe gaboniletik, enpresak zerbitzua bere gain hartu ebanetik mobilizazinoak egin dauzala nominak atzeratu eta ez ordaintzeagaitik. “Konpondu beharrean, ez ordaintzeak bata bestearen atzetik gertatu dira garagarrileko eta agorrileko nominetan (aparteko ordainsaria barne); horregaitik, egoera horren aurrean mobilizazino gogorrak iragarri doguz”, adierazo dabe.
“Unea da Correosek zerbitzua barneratzeko eta enpresa piratzen esku lagatzeari izteko, diru publikotik etekinik handiena ateratea baitabe helburu, langileen eta zerbitzuaren lan-baldintzak prekarizatzearen kontura”, salatu dabe. “Egoera horreek lan-prekariedadearen iturri handienetako bat, azpikontratazinoa, ezabatzeko burruka egitera garamatzate”, adierazo dabe.
Eguazten honetan batzarra egin dabe, eta Correosek egoera horren “larritasuna serioski hartzeko” eta gure soldatak ordaintzera “modu irmoan” behartzeko emon beharreko pausuak erabagi dituela ganeratu dabe.
Era berean, deitoratu dabe “ezinezkoa” dala “24 milioi euro baino gehiago” mobituten dauzan kontratu publiko batek langileak kobrau barik iztea, eta Correos garbiketa-enpresari ordaintzen ari jakola.
“Diru publikoa da, eta, beraz, erantzukizunak eskatzen ditugu, Correosek langile horrrekaz bildu behar dau eta azalpen egokiak emon behar ditu, langileei zor deutsiezan soldatak ordaintzera behartu leike eta behartu behar dau, jagokon berandutze-interesagaz”, ganeratu dau komunikaduak.
Horrez gain, Correosek “kontratazino publikoaren araudia aplikau behar dau, eta azpikontratautako enpresak beteten ez badau, kontratua deuseztatu behar deutso eta baldintza duinak bermatuko dituen agiri barri bat atera behar dau”.
