2024ko apirilaren 6an Errege Kopa altxatu eta gero, Athletic aurtengo edizinotik kanpo gelditu da final-zortzirenetan, Osasunaren aurka galdu eta gero (2-3). Athleticek partidu bakarrera galtzen dauan lehen kanporaketa da 2003tik. Izan be, formatu barria indarrean ipini zanetik, Athletic finalaurreko guztietara heldu da, gitxienez; bolada historikoa, noski, bere amaierara heldu da.
Ernesto Valverdek zaleek buruz ezagutzen daben hasierako hamaikakoa zelairatu dau. Halanda be, Sancetek ez dau jokatu, oindino lesionatuta dago-eta. Lehen zatian ikusitako erritmoa ez da bereziki bizkorra izan, baina 40. minututik aurrera partidua guztiz zoratu da. Aitatutako minutuan, Aimar Orozek Osasuna aurreratu dau markagailuan, Aresoren erdiraketa jaso eta gero. Lau minutu beranduago, Aitor Paredesen pasea labur gelditu da eta Julen Agirrezabalak penaltia egin deutso Budimirri. Hain zuzen be, Kroazioko jokalariak Osasunaren bigarren gola sartu dau penalti puntutik. Beraz, kanporaketa maldan gora ipini jako Athleticeri. Edozelan be, zaleak itxaropentsu joan dira atsedenaldira, Nico Williamsek 1-2koa sartu daualako luzapenean.
Athletic abordatzera urten da bigarren zatian. Zuri-gorriek bardinketaren gola oso azkar sartu dabe, Oscar de Marcosek 55. minutuan baloia sareetara bialdu dau eta. Bardindu eta gero, Athletic Osasuna baino gehiago izan da, baina egindako beste akats batek aukera barik itxi deutso talde bizkaitarrari. Athleticeko jokalariek Ruben Garciari jaurtitzen itxi deutsie eta Budimirrek Julen Agirrezabalak itxitako aldaratzea baliatu dau Osasuna barriro aurreratzeko. Azken minutuetan, Osasunak denpora asko galdu dau eta Athletic ez da gol aukera arriskutsurik sortzeko gai izan. Ondorioz, Errege Kopatik kanpo gelditu da Athletic.
Liga eta Europa Liga zerumugan
Superkopa eta Errege Kopako kanporaketak zortzi egunetan galdu eta gero, Athletic Ligan eta Europa Ligan dago bizirik momentu honetan. Zuri-gorriak ligako laugarren postuan dagoz eta bigarren sailkatuak dira Europa Ligan. Horren harira, Athleticen hurrengo norgehiagoka domekan izango da, eguerdiko 14:00etan, Celtaren aurka Balaidosen. Ostean, Athleticek Istanbulera osterea egingo dau Besiktas taldearen aurka jokatzeko, eguaztenean arratsaldeko 16:30etan.
