Domekan, urriaren 19an, Zornotzako Nazinoarteko Krosaren 71. edizinoa hartuko dau Amorebieta-Etxanok. Proba hau nazinoarteko egutegiko hitzordu finko bihurtu da. Ohiko dan moduan, Jauregibarriako zelaietan ospatuko da. World Athletics Croos Crountry Tour Gold zirkuituaren barruan, Zornotzako Nazinoarteko Krosak erreferentziazko proba izaten segiduten dau udagoieneko denboraldian, bai parte-hartzaileen kalidadeagatik, bai antolaketagatik be.
Ainhoa Salterain alkateak aurkezpenean adierazo dauanez, “Zornotzako Nazinoarteko Krosa Amorebieta-Etxanoren nortasunaren parte da. Ganera, ekitaldi honek munduko atletismoaren mapan kokatzen gaitu urtero, eta aldi berean, inklusinoa, parte-hartzea eta kirolarekiko konpromisoa indartzen dauz”. Leixuri Arrizabalaga Euskera, Kultura eta Kirol diputaduak azpimarratu dauanez, “1954an hasi zanetik, eliteko atletentzako eta atletismo herrikoia maite dabenentzako topagune bihurtu da ekitaldi hau”.
Zornotzako Nazinoarteko Krosak lasterketa-egitarau zabala izango dau domekan. Eskola-kategorietatik nazinoarteko elitera arteko probak egongo dira, bai emakumezkoetan, bai gizonezkoetan be. Nazinoarteko karrera absolutoak 12:15etan (emakumezkoen kategoria) eta 13:00etan (gizonezkoena) izango dira.
Trafikoan eraginak
Zornotzako Nazinoarteko Krosa dala eta, behin-behineko neurri hauek hartuko dira ibilgailuen trafikoari jagokonez:
- Jauregibarriako aparkalekuan ezin izango da aparkatu urriaren 18ko 23:00etatik urriaren 19ko 17:00etara.
- Ezin izango da ibilgailuz Jauregibarriako eremura sartu urriaren 19ko 07:00etatik 14:00etara, baimendutako pertsonak eta bertan bizi diran herritarrek izan ezik.
