Athleticek San Mamesetik urrun irabazi dau hiru hilabete beranduago eta amaiezina zirudien boladari amaierea emon deutso, Levanteren kontra 0-2 irabazita Ciutat de Valencia estadioan. Merezidutako garaipena izan da gainera. Athleticek denporaldiko lehen zatirik borobilena jokatu dau eta eukindako aukerei probetxua atera deutse. Markagailuan aurreratu eta gero, Athleticek emaitzagaz jokatu dau bigarren zatian eta Bilbora ekarri dau garaipena asko sufridu barik. Hiru puntuek indarra emongo deutsie talde bizkaitarrari, Real Madril, Atletico Madril eta PSG taldeen kontra jokatu aurretik.
Lehoiek oso modu serioan ekin deutsie partiduari. Iñigo Lekue izan da eskoiko laterala eta Alejandro Regok eta Alex Berenguerrek zigortutako Oihan Sancet eta Ruiz de Galarretaren tokiak hartu dabez hasierako hamaikakoan, hurrenez hurren. Partidua hasi eta berehala, markagailuan aurreratu da Athletic. Nico Williamsek ederki itxi deutso baloia Berenguerreri eta nafarrak erdiraketa perfektua jarri dau Robert Navarrok baloia sareetara bialduteko. Golak indarra emon deutso talde zuri-gorriari. Athleticek bigarrena sartzeko makina bat aukera euki dauz: Nico Williamsek baloia zutoinera errematau dau, Robert Navarrok larregi gurutzatu dau eukindako beste errematea, Matturro zentralak baloia ate azpitik atera dau…
Atsedenaldira 0-1 irabazten joango zala zirudienean, nabarmentzeko kontraerasoa burutu dabe lehoiek. Berenguerrek bere bigarren asistentzia emon eta Nico Williamsek erremate ederra egin dau Ryan atezainaren aurrean bigarren gola sartzeko, 44. minutuan. Partiduaren panorama ikusita, Calero Levanteko entrenatzaileak aldaketa hirukotxa egin dau bigarren zatia hasi aurretik: Romero, Cabello eta Brugue zelairatu ditu Koyalipou, Elgezabal eta Arriagaren ordez. Ganera, aldaketa erasokor gehiago egin ditu hurrengo minutuetan be, baina Valentziako taldea ezinean ibili da. Levante Athleticen areara gehiago hurreratu arren, talde bilbotarrak ez dau larregi sufridu eta Unai Simonek egin beharreko geldiketak egin ditu. Ganera, hirugarren gola sartzeko aukera paregabea euki dau Gorka Guruzetak, baina jokalari gipuzkoarrak ez dau asmatu. Kontuak kontu, Athleticek ederki eutsi deutso markagailuari eta hiru puntuak lortu ditu etxetik kanpo, lehenbiziko aldiz abuztuaren 31tik.
Denporaldiko asterik gogorrena
Real Madril, Atletico Madril eta PSG. Aitatutako hiru taldeak izango dira Athleticek eukiko dituan aurkariak San Mamesen abenduaren 3tik 10era. Duda barik, denporaldiko asterik gogorrena izango da hurrengoa. Levanteren kontra lortutako puntuek nolabaiteko aldea emon deutsie taldeari, baina zuri-gorriek dinamika negatiboa atzean uzteko garaipen gehiago beharko dabez.
Hasteko, Real Madrilen kontra jokatuko dabe Ernesto Valverderen gizonek eguazten honetan, arratsaldeko 19:00etatik aurrera, ligako 19. jardunaldian. Hain zuzen be, aurreratutako partidua izango da lehenengoa, 19.jardunaldia jokatu behar danean Saudi Arabian izango dalako Athletic Espainiako Superkopa jokatzen. Ostean, zapatuan, Atletico Madrilen kontra jokatuko dabe lehoiek, ligako 15. jardunaldian. Azkenik, Txapeldunen Ligara itzuliko da Athletic. Esan bezala, Txapeldunen Ligako oraingo txapelduna dan PSG etorriko da San Mamesera, abenduaren 10ean, gaueko 21:00etatik aurrera, lehiaketako seigarren jardunaldian.
