Abadiñoko Udalak Atxarteko Harrobien Paisaia Berreskuratzeko Plan Berezia, Atxarte osatzen, aurkeztu dau. Ekopol diziplina anitzeko ikerketa-talde espezializatuak landu dau ibilbide-orria, eta datozan hileetan Abadiñoko eta Durangaldeko herritarrakaz batera erabagiko da espazioaren izaera eta erabilera barria. Hileon hasi eta garagarrilera bitartean gauzatuko da Atxarte osatzen parte-hartze plana, eta informazino saio publikoak, tailerrak, inkestak, harrobira bisitak zein kontsultak egiteko eta proposamenak aurkezteko kanal digitalak jarriko dauz herritarren eskura.
Helburua, degradazino-egoeran dagoan gunea berreskuratzea da, Urkiolako Parke Naturalean integrautako espazio bizi bat sortzeko. Eremua herritarren eskura jarri gura da, balio soziala eta kulturala emonaz. Ingurumen kontserbazinoagaz bateragarria dan topagune bizi bat sortu nahi da. “Atxarteko harrobiak berreskuratzea tokiko nortasuna indartzea da, eta udalerriko, eskualdeko eta Bizkaiko ingurune natural enblematikoenetako bat babestea. Atxarteren etorkizuna modu kolektiboan, herritarrakaz batera, eraikitako proiektu bat izango da”, azpimarratu dau Mikel Urrutia Abadiñoko alkateak.
Atxarteko harrobiak 1971 eta 1996 bitartean ustiatu ziran kareharria ateratzeko. Jarduera behin betiko amaitu ostean, baina, ez ziran egin ingurumena lehengoratzeko beharrezko lanak. Gauzak holan, 50 hektareatik gorako azalera itxi zan lehengoratu barik, Parke Naturalaren Babes Bereziko eremu baten. Ekopolek egindako diagnostikoak berresten dauan lez, hainbat galera daukaz guneak momentu honetan: besteak beste, abandonatutako industria-azpiegiturak, erauzketa-jarduerak eragindako kalteak lurzoruan zein ezponden ezegonkortasunagaz eta higadura prozesuagaz lotutako arriskuak.
Atxarte osatzen parte-hartze prozesua
Atxarteko Harrobien Paisaia Berreskuratzeko Plan Bereziak diseinu parte-hartzailea dauka ardatz nagusi. Entzun eta alkarregaz erabagiko da harrobiaren etorkizuna. Parte-hartze prozesuak badauka ibilbide orria eta datozan hileetan gauzatuko da Abadiñoko eta Durangaldeko herritarrakaz batera. Atxarte osatzen parte-hartze programak informazino saio publikoak, tailerrak, inkestak, harrobira bisitak zein kontsultak egiteko eta proposamenak aurkezteko kanal digitalak jarriko dauz herritarren eskura. www.atxarteosatzen.eus webguneak jasoko dau parte hartze prozesuaren informazino eguneratua. Ganera, bertan, inkestak betetzeko eta argibideak eskatzeko aukera eskainiko da.
Egitasmoak lau jarduera eremu identifikau dauz, eta horreek guztiak landuko dira parte-hartze prozesuan zehar: paisaia eta ingurumena lehengoratzea, biodibertsidadea babestea, lurzoruaren deskontaminazinoa, eta balio soziala eta kulrurala zelan emon. Martitik garagarrilera bitartean, ondorengoak dira Abadiñon eta eskualdean antolatu diran parte-hartze jarduera irekiak:
- Martiak 12: Atxarte, iraganetik etorkizunera dokumentalaren proiekzinoa (Abadiñoko Errota Kultur Etxean, 19:00etan)
- Apirilak 23: Mahai-ingurua (Durangoko San Agustin Kulturgunean)
- Maiatzean: ‘Atxarte, auzoz auzo eraikitzen’ saio irekiak Abadiñoko auzoetan eta ‘Atxarte, auzoz auzo eraikitzen’ tailerrak Abadiñoko ikastetxeetan
- Bagilean: Atxarteko harrobietara ibilbide gidatuak
- Garagarrilean: Prozesuaren emaitzen aurkezpen ekintzak
