Planik Plan irratsaioaren emonaldi barri bati ekin deutsagu asteon Bizkaia Irratian. Barikuro, astegoienean zehar Bizkaiko txoko desbardinetan egongo diran ekintzen eta egitasmoen errepasoa burutzen dogu, geure lurraldean zer egongo dan jakin eta gura dozuen plana egin daizuen. Astegoien honetatik Delirium Tremensen kontzertua, ZEIDFEST festibala eta Cafe Quijanoren kontzertua nabarmendu doguz.
Barikua
Astegoien honetan plan asko egongo dira egiteke Bizkaian, barikutik hasita. Esaterako, barikuan hasi eta domekara arte luzatu egingo da Getxoko Liburu Azokea. Eguneko ekitaldiei jagokenez, arratsaldeko 17:30etan hasiko dira egitasmoak. Ordu horretan, Aulestiko Udal Aretoan, ‘Alpistegia’ haurrentzako bertso antzerkia eukiko dabe Uxue Alkorta eta Maren Basterretxea bertsolariekaz. Musikeari jagokonez, kontzertu ugari izango dira gauean. Esaterako, gaueko 21:00etan, Rulo y la Contrabanda Bilboko Campos Eliseos antzokian izango da eta Delirium Tremens taldeak kontzertua eskainiko dau Getxoko Muxikebarrin.
Zapatua
Hainbat ekitaldi ezbardin izango dira protagonista zapatu honetan Bizkaian. Esate baterako, Barakaldoko Bizkaia Aretoan, ZEIDFEST festibala ospatuko da. Eguneko ekitaldien esparruan, eguerdiko 13:00etan, Errigoitiko Ikuilu txokoan, Ibai Amillategi, Aitor Etxebarriazarraga eta Asier Legarreta bertsolariak izango dira. Goiz eguerditik arratsaldera goaz. 18:30etan, Mungiako Olalde aretoan, ‘Elara, bidaia bat izarretara’ obra ikusi ahalko da. Kontzertuei jagokenez, gaueko 21:00etan Bilboko Santana 27an, Paula Mattheusek kontzertua emongo dau.
Domeka
Astegoieneko azken egunari begira, hainbat ekitaldi izango dira Bizkaian. Esaterako, eguerdiko 13:30etan, Erandioko Goierri auzoan, bertso saioa eukiko dabe Amaia Iturriotz eta Unai Mendiburu bertsolarien eskutik. Ordu berean, Abadiñoko Amaraun Arte fabrikan, Kokeinek kontzertua eskainiko dau. Kontzertuen esparruan jarraituz, Bilboko Euskalduna Jauregian, Cafe Quijano musika taldea izango da, arratsaldeko 19:30etatik aurrera.
