Tecnaliak eta Down Sindromearen Fundazioak, adimen eta garapen desgaitasuna daukienei egunerokoan laguntzeko tresna teknologikoak aurkeztu dabez. Lankidetzan dabilz Tecnalia eta Euskal Herriko Down Sindromearen eta beste Adimen Urritasun batzuen Fundazioa. Adimen eta garapen desgaitasuna daben pertsonei eguneroko zereginak ingurune seguru baten egiteko lagunduko deutsen tresna teknologikoak garatu dabez. Tecnalian bertan sortu zan tresna honeek sortzeko ideia. Errealidade birtualeko eta errealidade areagotuko teknologian oinarritutako aplikazinoak garatu dabez. Erlantz Loizaga Tecnaliako ikertzaileak bien erabileraren beharra azpimarratu dau.
Hiru aplikazino
Hiru dira sortutako aplikazinoak. Metroan bidaiatzen dut da euretariko bat. Down Sindromearen Fundaziotik, Amaia Peulak azaldu deusku zelan erabiltzen dan. Bere esanetan, Barik txartela kargatzeko orduan erabili leikie, besteak beste eta beti be, inoren laguntzarik barik. Nire garbigailua litzateke beste aplikazinoa eta azkena garbigailua jartzeko esperientzian dago oinarrituta. Azken bi honeek, bakarrik bizi diranei begira sortu arren, edonorentzat balio dabela gogoratu dau Peulak.
Garatutako teknologia honeek Tecnaliaren Kayrox izeneko plataforman daukie abiapuntua. Plataforma honek, murgiltze-aplikazino gehiago sortzeko aukerea emoten deutse adituak ez diran pertsonei. Down Sindromearen Fundazinotik esan deuskuenez, hamar puntuko balorazinoa egiten dabe aplikazino bien sorreraren inguruan. Oso pozik dagoz emaitzakaz. Tecnaliatik, laguntzen jarraituko dabela esan dau Erlantz Loizagak. Aplikazinoak garatzeko Bilboko Metroaren parte hartzea be azpimarratu dau.
