Durangaldeko Artisten Elkarteak (DAE-AAD) I. Durangoko Argazki Rallya antolatu dau garagarrilaren 5ean. “Argazkilaritzaz gozatzen daben guztientzako hitzordu ezinhobea izango da, eta zalantzarik barik, aukera aparta izango da zaletuak herriko kaleetan zehar ibiltzeko, euren begirada fotografikoa eta kamerakaz daukien trebetasuna proban jarriz”, azaldu dabe. Izena domekan bertan emon beharko da, 08:30-09:30 bitartean, Ezkurdi aretoan. Hamar euro ordaindu beharko dabe parte hartu gura dabenek.
Danetara, 600 euro banatuko dabez saritan: 250 euro lehenengoarentzat, 200 euro bigarrenarentzat eta 150 euro hirugarrenarentzat, Dendak Bai alkarteko erosketa txarteletan. 11:30ean hamaiketako egingo dabe parte hartzaileek. 13:30-14:30 bitartean irudiak deskargauko dabez, eta horregaz amaitutzat emongo dabe rallya. Lehiaketea Euskadiko Herriz Herri Argazki Rallyen txapelketearen barruan kokatzen da, eta sailkapen nagusirako puntuagarria da. “Formatua ezagutzen ez daben argazkizaleentzako aukera bikaina da, diziplina honen erakargarritasuna bertatik bertara bizitzeko, batez be”, animau gura dabez herritarrak antolatzaileek. Javier lopez Fabian argazkilari profesionala arduratuko da rallyaren koordinazinoaz.
