Sara Txurruka Lekeitioko Orekan Bat zentroko nutrizionistearen arabera, fruitu lehorrak dieta osasuntsu baten parte izan daiteke, baldin eta modu orekatuan kontsumiduten badira. “Oso errazak dira jateko eta edozein momentutan hartzeko” azpimarratu dau.
Adituak azaldu dauanez, fruitu lehorrek hainbat onura daukiez osasun kardiobaskularrerako, izan be, gantz osasungarriak daukiez, LDL kolesterol txarra jaisten laguntzen dabenak eta HDL kolesterol ona handitzen dabenak. Ganera, burmuinaren osasuna babesteko lagungarriak dira, Omega-3 gantz-azidoak eta antioxidatzaileak daukiezalako. Horrezaz gain, fruitu lehorrak proteina begetalen iturri bikainak dira, nahiz eta proteina guztiak osatzeko beste elikagaiekaz konbinatu behar diran.
Kontsumoari jagokonez, Sara Txurrukak aholkatzen dau egunean eskukada itxi bat hartzea. “Garrantzitsua da gatzik bakoak aukeratzea eta frijiduak saihestea” gehitu dau, ultraprozesaduen bidez gatz gehiegi hartzea arriskutsua izan daitekelako.
Fruitu lehorren bariedadeari jagokonez, Txurrukak nabarmendu dau intxaurrak oso baliagarriak dirala burmuinaren funtzionamendua hobetzeko, almendrak kaltzio iturri bikaina dira, eta pistatxoek ikusmenerako onurak izan leikez. Anakardoek, barriz, magnesio kopuru altuagaitik nabarmentzen dira.
