Korrika ardatz hartuta, dokumental bat egingo da euskerearen egoerea eta etorkizunaz aritzeko. www.jalgihadi.eus webgunean dokumentala egiteko dirua batzeko kanpainea hasi da. Mikrokutana ekoiztetxeagaz batera ,Korrika eta AEKk abian jarritako egitasmoa da dokumentala. 2027. urteko Zinemaldian estreinatu ahal izatea da erronka. Mikrokutana ekoiztetxea arduratuko da lanaz. Amaia Merino eta Ander Iriarteren arteko ekoiztetxea da. Iriarte bera izango da ikus-entzunezkoaren zuzendaria. Aipatu deuskunez, danok alkartzeko ideia modura sortu da ekimena. Euskeraren aldeko ekimen erraldoiena da Korrika. Dokumentalean, Korrika bat zelan antolatzen dan erakusteaz gain, euskeraren ganeko kezka eta hausnarketea agertzea da asmoa. Hausnartu eta eragitea lortu gurako leukiela esan deusku Lurdes Etxezarreta AEKko nazino kontseiluko kideak.
Diru bilketea
Arlo desbardinetako adituakaz izan dira dagoeneko euren ekarpenak batzen. Momentu honetan, barriz, diru-bilketa kanpainea dago abian www.jalgihadi.eus webgunean. Gitxienez 30 mila euro lortu gurako leukiez. Ane Elordi Korrikako arduradunaren esanetan, lasterketa luze modura aurkeztu dabe kanpainea. Kanpainan parte hartzen daben pertsona, alkarte, enpresa, kooperatiba etabarrek sariak jasoko dabez. Prozesu parte-hartzailea azpimarratu dabe egileek.
Aurten ez daukagu Korrikarik baina hurrengoa prestatzen badabiz. Datorren astean batzar orokorra dauka AEKk. Lurdes Etxezarretak aurreratu deuskunez, hurrengo Korrikaren leloaz, mezuaz, ibilbideaz edo omenduaz egingo dabe berba.
