Amorebieta-Etxanok Gure Lurreko Merkatua jarriko dau martxan irailaren 22an. Tokiko produktuen asteroko merkadu barriak lehen sektorea indartzea, zuzeneko salmenta bultzatzea eta herritarrei hurreko, kalidadezko eta sasoiko elikagaiak eskaintzea dauka helburu. Azokea martitzenero egingo da, 17:00etatik 20:00etara, Zelaietako estalpean, eta zortzi postugaz hasiko da. Amorebieta-Etxanoko eta Bizkaiko beste herri batzetako ekoizleek euren produktuak zuzenean eskainiko dabez, bitarkaririk barik.
Gure Lurreko Merkatua BIZKAIMENDI Bizkaiko Landa Garapeneko Elkarteen Federazinoa bultzatutako ekimena da, eta 2014tik Bizkaiko hainbat udalerritan garatzen da. Amorebieta-Etxanon, Urkiola Landa Garapen Alkarteak, Amorebieta-Etxanoko Udalak eta tokiko ekoizleek alkarlanean garatu dabe proiektua. Ekimenaren bitartez, ekoizleen eta kontsumitzaileek arteko hartuemon zuzenean indartu gura da. Merkaduaren helburuetako batzuk tokiko produktuak zuzenean eta bitartekaririk barik merkaturatzea, ekoizleen jarduera errentagarriagoa eta iraunkorragoa izatea, eta nekazaritza-sektorearen bideragarritasun ekonomikoa sendotzea da.
Gure Lurreko Merkatua zortzi postugaz hasiko da, tokiko ekoizleei lehentasuna emonda eta eskaintza Bizkaiko beste herri batzuetako ekoizleakaz osotuz. Parte hartuko daben ekoizleen artean dagoz: Amorebieta-Etxanoko Ibarra Baserria (barazki ekologikoak), Iraunkor Elkartea (KmO produktuak eta produktu ekologikoak), eta Errotik Gaztaie (behi-gaztai eta bere ustiategiko esneagaz egindako jogurt ekologikoak); Orozkoko Lusuri Gazta (ardi-gaztaia) eta Urigoitiko Txorizoak (txorizo eta txarritik eratorritako produktuak); Lezamako La Gilda del Norte (gildak eta piperrak); Amorotoko Daonaz (berakatz baltz ekologikoa); eta Elorrioko Orbe Goikoa Baserria (baserriko ogi eta artisau-gozoak).
Herritarrak merkadura erosotasunez hurreratzeko aukerea izan dagien, Amorebieta-Etxanoko Udalak gogoarazo dau Zelaietako aparkalekuak 150 plaza dauakazala eta lehen hiru orduak doakoak dirala. Holan, merkadura erosketak egitera joaten diran pertsonek aparkaleku hori debalde erabili ahal izango dabe denbora tarte horretan.
