Bilbok GEM Global Ekintzailetza Topaketa hartuko dau zezeilaren 18an eta 19an. Mundu osoko 52 herrialdetako ekintzailetza ikerlariak, adituak eta akademikoak izango dira Bizkaia Aretoan, ekintzailetzaren egungo egoera eta erronkak aztertzeko. Topaketaren barruan, hainbat mahai-inguru eta berbaldi egingo dira, besteak beste, ekintzailetza eta jasangarritasuna, emakume ekintzaileen erronkak eta ekintzailetza globalaren joerak aztertuz. Unibertsidadeetako ikertzaileez gain, inbertitzaileak, erakunde publikoetako ordezkariak eta ekosistemako bestelako eragileak be batuko dira Bilbon.
Global Entrepreneurship Monitor (GEM) biltzarra 1999. urtean sortu zan, ekintzailetzaren bilakaera aztertzeko metodologia bateratua erabiliz. Iñaki Peña Euskal Ekintzailetzaren Behatokiko ikertzaileak azaldu dauanez, “herrialde desbardinetako datuak alderatzen dira, ekosistemak zelan garatzen ari diran ulertzeko”. GEM munduko erreferentziazko ekitaldia da ekintzailetzaren ikerketa eta analisiaren arloan. Peñaren esanetan, “Bilbo, ekintzailetzaren munduko mapan kokatzeko aukera parebakoa da topaketa hau”.
Euskadiko ekintzailetza osasuntsu ete dagoan itaunduta, Euskal Ekintzailetzaren Behatokiko ikertzaileak erantzun deusku, Euskadi Europako batez bestekoagaz parean dagoala, nahiz eta hondino erronka batzuk egon. “Gure ekintzailetza maila %5-7 ingurukoa da populazio aktiboaren artean, eta Europa mailan paretsu gabilz”, azaldu dau. Topaketa hau Euskadiren nazinoarteko proiekzinoa indartzeko baliagarria izango dala azpimarratu dau. Hemengo ekintzailetza ereduak kanpora zabaltzeko eta atzerriko eragileakaz hartuemonak sendotzeko aukera izango dabela gaineratu dau Iñaki Peñak Lau Haizetara irratsaioan.
