Bizkaia Irratia Bizkaia osoa ezagutzen dabil apurka apurka, astero herriren batetik zuzenenean saioa eginda. Herriz Herri saioetan danetarikoa lantzen da: udal gorabeherak, herrirako proiektuak, alkarteen zeregina, arlo sozioekonomikoa, kulturea, kirola… Ezagutu Bizkaiko herri ezbardinak Herriz Herri saioekin.
Asteon Zamudiora hurreratu gara. Lander Aretxabaleta herriko alkateak herriaren gorabeherak azaldu deuskuz, martxan daukiezan proiektu nagusiak eta zelako garrantzia daukan holako azokea herria eta herritarrentzat. Itziar Landeta kultura zinegotziak herriaren jaien barri emon deusku, San Martinen barri. Gero, postuetara hurreratu gara talogilea dan Aitor Aurrekoetxeagaz, eta bitxiak sortu eta saltzen dauzan Esti Yuguerosekin berba egitera. Azkenik, Oneka Zaballa, Dimako abeltzainagaz sakon berba egin dogu daukan bizitzaz landa-eremuan, egunerokotasunari buruz eta baserrian daukiezan behiei buruz.
