Borja Cobeagak zuzendutako Los aitas pelikulea Malagako Zinemaldiko lehiaketatik kanpoko Sail Ofizialean estreinau ostean, martiaren 21ean iritsiko da zine aretoetara. 80ko hamarkadearen amaieran Bilbon girotutako road movie bat da. Guraso talde baten bidaia kontetan dau. Euren alabek Berlinen egingo daben gimnasia erritmikoko lehiaketa baten parte hartu gura dabe, baina amek ezin izango dabe bidaian joan eta ondorioz, aitak izango dira alabak Berlinera eroango dabezanak.
Mikel Losada aktore bizkaitarrak Lau Haizetara irratsaioan azaldu dauanez, filmak 80ko hamarkadako Bilbo industrialaren testuingurua erakusten dau. Langabeziaren, krisi ekonomikoaren eta gizartearen aldaketen erdian galduta dagozan pertsonaiak aurkezten dauz. Mikelen pertsonaia bere alabeagaz hartuemon urria daukan aita da, eta pelikulan zehar aukerea izango dau lotura hori berreskuratzeko.
Quim Gutiérrez, Juan Diego Botto, Ramón Barea, Sofía Otero edota Iñaki Ardanaz aktoreak be azaltzen dira Los aitas pelikulan. Losadak azpimarratu dauanez, Ramon Bareagaz barriro lan egitea berezia izan da berarentzat, izan be, Barearen gidaritzapean hasi zan antzerki munduan. Ganera, aktore gazteakaz lan egitea erronka eta ikaskuntza handia izan dala azaldu dau Mikel Losadak. Zuzendaritzeari jagokonez, Borja Cobeagaren esanetara lan egitea, plazerra izan dala aitortu deusku aktoreak.
Los aitas pelikulak umorea eta gizarte kritika buztartzen dauz. Mikel Losadak gaineratu dauanez, “ikusleek barre egingo dabe, baina baita hausnarketa bat be, aitatasunari eta familia-harremanei buruz, eta igual malkoren bat be atarako jake”.
