Osasungintza Publikoaren Aldeko herri plataformak 4. Batzar Nagusia egin barri dau. Osasunaren inguruan mobilizazion soziala sustatu dau sortu zanetik eta apurka, gero eta herri gehiagotan eratzen dabilz. Mireia Saiz plataformako bozeroalea izan da gure estudioetan. Gaur egungo osasun sistemaren egoera salatzeaz aparte, euren osasun eredua gizarteratzeko lanean jarraituko dabe: %100 publikoa, lehen arreta erdigunean ipinita eta inbertsino publikoa izango dauana.
Osasun Itunean parte hartzeko gonbidapena azken fasean jaso ebela eta ezetza emon ebela aitortu deusku Mireia Saizek. “Lan talde baten parte hartzeko deia jaso genuen, 30 talde dagozanean. Parte hartze xumea eskaini euskuen. Uste dogu gaitasuna eta eskubidea daukagula herritar modura gai garrantzitsuetan parte hartzeko”. Osasun Ituna sarri marketing hutsa dala salatu dabe plataformatik. Euren ustez “osasun itunak ez dau bermatzen neurri estrukturalak hartuko diranik”.
